موربی پل حادثہ: ’اوریوا‘ گروپ کے چیف منیجنگ ڈائریکٹر کی ضمانت عرضی ہائی کورٹ سے خارج

موربی پل منہدم ہونے سے متعلق ایک معاملے میں آج گجرات ہائی کورٹ نے فیصلہ سنایا۔ معاملہ ایوروا گروپ کے چیف منیجنگ ڈائریکٹر (سی ایم ڈی) جئے سکھ پٹیل کی مستقل ضمانت سے متعلق تھا۔ اس پر سماعت کرنے کے بعد گجرات ہائی کورٹ نے عرضی کو مسترد کرنے کا اعلان کر دیا۔ یہ فیصلہ جسٹس دویش جوشی نے سنایا۔

قابل ذکر ہے کہ 30 اکتوبر 2022 میں موربی سسپنسن پل منہدم ہو گیا تھا جس کا کلیدی ملزم اوریوا گروپ کے سی ایم ڈی جئے سکھ پٹیل کو بنایا گیا تھا۔ موربی پل حادثہ میں کلیدی ملزم نامزد کیے جانے کے بعد جنوری 2023 میں جئے سکھ پٹیل نے خود سپردگی کر دی تھی اور تبھی سے وہ جیل میں بند ہیں۔ ان کی مستقل ضمانت عرضی پہلے بھی ذیلی عدالتوں کے ذریعہ خارج کر دی گئی تھی، اور اب گجرات ہائی کورٹ نے بھی انھیں راحت نہیں دی ہے۔

واضح رہے کہ ایڈیشنل ایڈووکیٹ جنرل متیش امین نے پہلے کی سماعت کے دوران ہائی کورٹ کو بتایا تھا کہ جانچ افسر نے اس سال 18 ستمبر کو ایک سیشن عدالت کو مطلع کیا تھا کہ پل منہدم ہونے کی جانچ کے سبھی پہلوؤں اور خصوصیات کو احاطہ کیا گیا تھا اور کچھ بھی نہیں چھوڑا گیا تھا۔ ضمانت کے لیے دلیل دیتے ہوئے جئے سکھ پٹیل کے وکیل نروپم ناناوٹی نے عدالت سے کہا تھا کہ پل مینجمنٹ اور رکھ رکھاؤ اوریوا گروپ کے لیے فائدہ کمانے والا نظام نہیں ہے۔ انھوں نے کہا کہ اوریوا گروپ کے ملازمین نے چھٹی کا دن ہونے کے سبب لوگوں کی بھیڑ کو پل پر آنے کی اجازت دی۔ دوسری طرف جئے سکھ پٹیل کی عرضی کی مخالفت کرتے ہوئے متاثرین کے وکیل راہل شرما نے کہا کہ ملزم کے ضمانت پر چھوٹنے کی حالت میں گواہوں کے ریکارڈ کے ساتھ چھیڑ چھاڑ ہونے کا امکان ہے۔