’موہن بھاگوت کو رام مندر تعمیر ٹرسٹ کا سربراہ بنایا جائے‘

رام مندر تعمیر کرنے کے لیے سپریم کورٹ نے مرکزی حکومت کو ٹرسٹ بنانے کا حکم دیا ہے، لیکن اس کا سربراہ کون ہوگا، اس پر تنازعہ لگاتار بڑھتا ہی جا رہا ہے۔ رام جنم بھومی نیاس کے سرکردہ عہدیداران پر سنگین الزام عائد کرنے والے مہنت پرم ہنس مہاراج نے کہا ہے کہ جس طرح کے حالات پیدا ہو رہے ہیں، اس میں آر ایس ایس چیف موہن بھاگوت کو ایودھیا میں رام مندر تعمیر کے لیے بننے والے ٹرسٹ کا سربراہ بنایا جانا چاہیے۔

مہنت پرم ہنس مہاراج نے اپنی یہ خواہش پیر کے روز ظاہر کرتے ہوئے کہا کہ رام جنم بھومی نیاس کے سربراہ مہنت نرتیہ گوپال داس اور سابق رکن پارلیمنٹ رام ولاس ویدانتی کی سوچ بہت چھوٹی ہے اور ان دونوں نے بہت بڑے بڑے گھوٹالے کیے ہیں۔ اس لیے حکومت کو چاہیے کہ وہ ان دونوں افراد کو ٹرسٹ سے دور رکھتے ہوئے آر ایس ایس سربراہ موہن بھاگوت کو مندر تعمیر کے لیے بننے والے ٹرسٹ کا چیئرمین بنائے۔‘‘

دراصل مہنت پرم ہنس آج بھدوہی میں سیتامڑھی واقع سیتا سماہت استھل پہنچے تھے جہاں انھوں نے نامہ نگاروں سے بات چیت کے دوران اپنی خواہش کا اظہار کیا۔ انھوں نے کہا کہ ایسا نظام بنایا جانا چاہیے کہ جو بھی آر ایس ایس کا سربراہ بنے، وہ خود بہ خود ٹرسٹ کا چیئرمین بن جائے۔ ساتھ ہی مہنت پرم ہنس نے کہا کہ سَنگھ پریوار کو ہی مندر تعمیر کی ذمہ داری بھی سونپ دی جائے۔

مہنت پرم ہنس نے الزام عائد کیا کہ جیسے ہی سپریم کورٹ نے مرکزی حکومت کو مندر تعمیر کے لیے ٹرسٹ بنائے جانے کا حکم دیا، مہنت نرتہی گوپال داس نے عہدہ کے لالچ میں اپنے ٹرسٹ کے ذریعہ مندر تعمیر کی بات کی۔ دوسری طرف رام ولاس ویدانتی نے وزیر اعلیٰ یوگی آدتیہ ناتھ کو ٹرسٹ کا چیئرمین بنانے کے مطالبے کو یہ کہتے ہوئے مسترد کر دیا کہ ’ناتھ طبقہ‘ مندر کی تعمیر نہیں کر سکتا۔

مہنت پرم ہنس نے اپنی بات نامہ نگاروں کے سامنے رکھتے ہوئے یہ بھی کہا کہ جب مہنت نرتیہ گوپال داس اور ویدانتی کی مخالفت کی تو ان کے غنڈوں نے ان پر حملہ کیا اور ایودھیا چھوڑنے کے لیے مجبور کر دیا۔ غور طلب ہے کہ رام جنم بھومی نیاس کے سربراہ مہنت نرتیہ گوپال داس کے تئیں مبینہ قابل اعتراض تبصرہ سے ناراض ان کے بھکتوں نے گزشتہ 15 نومبر کو مہنت پرم ہنس کے کمرے پر حملہ کر دیا تھا۔ اس واقعہ کے بعد وہ ایودھیا سے کاشی چلے گئے تھے۔