مودی کا 2014 کا وژن ناکام ہو گیا ہے: راہل گاندھی

نئی دہلی: کانگریس کے سابق صدر راہل گاندھی نے وزیر اعظم نریندر مودی پر حملہ کرتے ہوئے کہا ہے کہ 2014 میں دیا گیا ان کا وژن ناکام ہو چکا ہے اور اب ملک کو ایک نئے نقطہ نظر کی ضرورت ہے جس کی شروعات ان کی پارٹی اتر پردیش سے کر رہی ہے۔

راہل گاندھی نے جمعہ کو یہاں کانگریس ہیڈکوارٹر میں اتر پردیش اسمبلی انتخابات کے لیے پارٹی کے ’بھرتی وِدھان یو اگھوشنا پتر‘ (بھرتی، اسمبلی نوجوان انتخابی منشور) جاری کرتے ہوئے کہا کہ مودی نے 2014 کے عام انتخابات میں ملک کے عوام کے سامنے جو وژن رکھا تھا وہ چل نہیں پایا ہے لہذا ملک کو آگے بڑھانے کے لیے، کانگریس نئے انتخابی منشور کے ساتھ آئی ہے اور اس نقطہ نظر کو اس نے اترپردیش میں شروع کر دیا ہے۔

انہوں نے کہا کہ اس نقطہ نظرسے نہ صرف اتر پردیش میں تبدیلی آئے گی بلکہ اس سے پورے ملک میں ایک نیا شعور پیدا ہوگا۔ انہوں نے کہا کہ اتر پردیش کانگریس نے نوجوانوں پر مرکوز انتخابی منشور کے ذریعہ جنرل سکریٹری اور یو پی انچارج پرینکا گاندھی کی قیادت میں جو تبدیلی شروع کی ہے۔ وہ پورے ملک میں تبدیلی لانے والا ثابت ہوگا۔

راہل گاندھی نے کہا کہ ملک کا نوجوان سب کچھ دیکھ رہا ہے اور جس دن انہوں نے اپنے دل کی بات کہنا شروع کر دی،اسی دن سے مودی حکومت کا خاتمہ شروع ہو جائے گا۔انہوں نے کہا،’ملک کے نوجوانوں نے اپنے دل کی بات بولنا شروع کر دی ہے،ملک کا نوجوان روزگار مانگ رہا ہے۔ مودی حکومت کا خاتمہ قریب ہے‘۔

کانگریس کے رہنما نے کہا،’جو چیزیں دل، ذمہ داری اور ایماندار سے کی جاتی ہیں ان کا نتیجہ اچھا ہی ہوتا ہے۔ یو پی کے عوام کو اور کانگریس کے ہر کارکن کو میری نیک خواہشات‘۔