گوڈسے کو محب وطن بتانے والی پرگیہ پر کارروائی کریں مودی: کانگریس

نئی دہلی: کانگریس نے کہا کہ بھارتیہ جنتا پارٹی کی بھوپال لوک سبھا سیٹ سے امیدوار پرگیا ٹھاکر نے بابائے قوم مہاتما گاندھی کے قاتل ناتھورام گوڈسے کو سچا محب وطن بتاکر پوری قوم کی توہین کی ہے اور وزیراعظم نریندر مودی کو اس کیلئے انہیں سزا دیکر پورے ملک سے معافی مانگنی چاہئے۔

کانگریس کے محکمہ مو اصلات کے سربراہ رندیپ سنگھ سرجے والا نے جمعرات کو یہاں پارٹی ہیڈکوارٹر میں پریس کانفرنس میں کہاکہ گاندھی جی کے نظریات پر بی جے پی کا حملہ جاری ہے۔ سادھوی پرگیا ٹھاکر کے بابائے قوم کے قاتل کی شان میں قصیدے پڑھنے سے بی جے پی کا تشدد آمیز چہرہ سامنے آیا ہے کہ بی جے پی کے لوگ گوڈسے کی اولاد ہیں۔

انہوں نے الزام لگایا کہ بی جے پی بار بار اپنے لیڈروں سے بابائے قوم کی سوچ، راستے اور نظریات پر گھناونے حملے کررہی ہے۔ انہوں نے ان حملوں کو گاندھی کے اصولوں کو نظرانداز کرنے کی سازش قرار دیتے ہوئے کہا کہ شہدا اور عظیم ہستیوں کی توہین بی جے پی کے کلچر کا حصہ بن گیا ہے۔

کانگریس کے ترجمان سرجے والا نے کہاکہ حال ہی میں محترمہ ٹھاکر نے 26/11کے ممبئی حملے کے شہید ہیمنت کرکرے کو ’ملک کا غدار‘ بتاکر اور ان کے پورے کنبہ کو شاپ دینے کا جرم کیا تھا لیکن ان کی امیدواری واپس لینے اور ملک سے معافی مانگنے کی بجائے مودی نے ان کا دفاع کیا۔

اسی طرح سے باپو کے 71ویں یوم قربانی پر گزشتہ 30جنوری کو سنگھ سے وابستہ ایک تنظیم نے گاندھی جی کا پتلا بناکر ایئر پسٹل سے اسے گولی ماری اور گوڈسے کی شان میں قیصدے پڑھے۔ اس سے پہلے بی جے پی کے رکن پارلیمان اور پارٹی کی مرکزی ورکنگ کمیٹی کے رکن ساکشی مہاراج نے پارلیمنٹ کے احاطہ میں بابو کے قاتل کو محب وطن قرار دیا تھا۔ بی جے پی نے اپنے ان لیڈروں کے خلاف کوئی کارروائی نہیں کرکے ثابت کردیا ہے کہ بی جے پی کے لوگ گوڈسے کی اولاد ہیں۔

انہوں نے کہا کہ بی جے پی نہ صرف گوڈسے کی شان میں قصیدے پڑھتی ہے بلکہ محمد جناح کی تعریف بھی کرتی ہے۔ اس سلسلہ میں انہوں نے مدھیہ پردیش کے رتلام سے پارٹی کے امیدوار گمان سنگھ ڈامور کی مثال دی اور کہا کہ ڈامور نے ملک کو تقسیم کرنے والے محمد علی جناح کو ملک کا پہلا وزیراعظم بنانے کی وکالت کی تھی۔ اس کو سزا دیئے جانے کے بجائے نریندر مودی رتلام جاکر اس کی پیٹھ تھپتھپاتے ہیں اور عوامی جلسہ کرکے اسے جیتانے کی اپیل کرتے ہیں۔