سرمایہ داروں کا 23 کھرب کا قرض معاف! مودی حکومت کسانوں کی نہیں صنعتکاروں کی خیرخواہ: راہل گاندھی

نئی دہلی: کسانوں کی تحریک اور کورونا کی صورت حال کے معاملہ پر کانگریس مودی حکومت پر لگاتار حملے کر رہی ہے۔ اسی ضمن میں کانگریس کے سابق صدر راہل گاندھی نے ترقی کے معاملہ پر مودی حکومت کو آڑے ہاتھ لیا ہے۔ کانگریس کے سابق صدر راہل گاندھی نے کہا ہے کہ مودی سرکار کسانوں کے مفادات کی باتیں کر کے محض دکھاوا کرتی ہے، لیکن حقیقت میں وہ سرمایہ داروں کی خیرخواہ ہے اور اسی وجہ سے اس نے صنعتکاروں کا کھربوں روپے کا قرض معاف کیا ہے۔

راہل گاندھی نے کہا ’’23 کھرب 78 ارب 76 کروڑ روپے کا قرض اس سال مودی حکومت نے کچھ صنعتکاروں کا معاف کیا۔ اس رقم سے کووڈ کے مشکل وقت میں 11 کروڑ کنبوں کو 20- 20 ہزار روپے دیئے جاسکتے تھے۔ مودی جی کی ترقی کی حقیقت۔‘‘

مودی سرکار کو صنعتکاروں کے لئے کام کرنے والی مشینری قرار دیتے ہوئے راہل گاندھی اس پر مسلسل حملہ کرتے ہوئے کہتے ہیں کہ اسے عام لوگوں اور کسانوں سے زیادہ اپنے چند سرمایہ دار دوستوں کی فکر ہوتی ہے اور ان کے حق میں بار بار فیصلے لیتی ہے۔

راہل گاندھی اس سے پہلے بھی مرکزی حکومت پر نشانہ لگا چکے ہیں۔ حال ہی میں انہوں نے کہا تھا کہ وزیر اعظم نریندر مودی نے ہر شہری کے بینک کھاتے میں 15 لاکھ اور ہر سال 2 کروڑ ملازمتوں کا وعدہ کیا تھا۔ نوٹ بندی کی یاد دلاتے ہوئے راہل گاندھی نے کہا کہ وزیر اعظم مودی نے کہا تھا کہ مجھے 50 دنوں کا وقت دیجئے سب کچھ ٹھیک کر دوں گا۔ اسی طرح کورونا وائرس کے معاملہ پر بھی وزیر اعظم نے جنگ جیتنے کے لئے 21 دنوں کا وقت مانگا تھا لیکن کسی بھی معاملہ میں انہیں کامیابی نہیں ملی۔