مودی کی ویتنام کے نئے وزیر اعظم فام منھ چنھ کو مبارکباد

نئی دہلی: وزیر اعظم نریندر مودی نے آج ویتنام کے وزیر اعظم فیم منھ چنھ سے فون پر بات کی۔ وزیر اعظم نریندر مودی نے ویتنام کا وزیر اعظم مقرر کیے جانے پر فیم منھ چنھ کو مبارکباد پیش کی اور اس بات پر اعتماد کا اظہار کیا کہ ان کی رہنمائی میں ہندوستان- ویتنام جامع اسٹریٹجک شراکت داری مستحکم ہوتی رہے گی۔

وزیراعظم نے اس بات کا خیر مقدم کیا کہ دونوں ملکوں کا ایک کھلے، شمولیت والے، پر امن اور قانون کی حکمرانی والے بحر ہند خطے کے بارے میں یکساں نظریات رکھتے ہیں اور اس لئے ہندوستان-ویتنام جامع اسٹریٹجک شراکت داری سے خطے کے استحکام، خوشحالی اور ترقی کو فروغ حاصل ہوتا رہے گا۔ اس سلسلے میں وزیر اعظم نے اس بات کا ذکر بھی کیا کہ اس وقت ہندوستان اور ویت نام دونوں اقوام متحدہ کی سلامتی کونسل کے ساتھی ارکان ہیں۔

وزیر اعظم نے ہندوستان میں کووڈ-19 عالمی وبا کی دوسری لہر کے دوران حکومت ویتنام اور وہاں کے عوام کے ذریعہ گراں قدر امداد فراہم کرانے پر وزیر اعظم چنھ کا شکریہ ادا کیا۔ دونوں لیڈروں نے اس بات پر اتفاق کیا کہ وہ عالمی وبا کے دوران ایک دوسرے سے مشورہ کرنا اور ایک دوسرے کی مسلسل کوششوں میں مدد کے لئے تعاون کرنا جاری رکھیں گے۔

دونوں وزرائے اعظم نے دو طرفہ تعلقات کی صورتحال کا جائزہ لیا اور تعاون کے مختلف شعبوں سے متعلق تبادلہ خیال کیا۔ اس بات کا ذکر کرتے ہوئے کہ سال 2022 دونوں ملکوں کے سفارتی تعلقات کے قیام کی 50ویں سالگرہ کا سال ہے، انہوں نے اس مبارک موقع کو مختلف یادگاری تقاریب کے ذریعہ مناسب طریقے سے منانے پر اتفاق کیا۔ وزیر اعظم مودی نے وزیر اعظم چنھ کو جلد ہی کسی مناسب تاریخ کو ہندوستان کے سرکاری دورے پر آنے کے لئے بھی مدعو کیا۔