مودی کابینہ نے ’بھیم یو پی آئی‘ کے استعمال پر انسینٹیو دینے کا کیا فیصلہ، 3 ملٹی لیول کوآپریٹو سوسائٹی بنانے کا بھی اعلان

مودی کابینہ کی اہم میٹنگ میں آج کچھ انتہائی اہم فیصلے لیے گئے ہیں۔ پہلا بڑا فیصلہ تو مرکزی کابینہ نے کم رقم کے ڈیجیٹل ٹرانزیکشن کے لیے 2600 کروڑ روپے کی ’حوصلہ افزائی رقم‘ کو منظوری دینے کا فیصلہ کیا ہے۔ یعنی بھیم یو پی آئی سے ٹرانزیکشن پر انسینٹیو دیا جائے گا۔ ایک دیگر اعلان کیا ہے تین ملٹی لیول کوآپریٹو سوسائٹی کی تشکیل دینے کو لے کر۔ ان دونوں فیصلوں کو بہت اہم تصور کیا جا رہا ہے، خصوصاً بھیم یو پی آئی سے ڈیجیٹل ٹرانزیکشن پر انسینٹیو دینے کے فیصلے کو۔ اس سے ڈیجیٹل لین دینے میں خاطر خواہ اضافہ کی امید کی جا سکتی ہے۔

مذکورہ بالا دونوں فیصلوں کے علاوہ مودی کابینہ نے پی ایم مفت اناج منصوبہ کا نام بدلنے کا بھی فیصلہ لیا ہے۔ گزشتہ کابینہ میٹنگ میں مفت اناج منصوبہ کو ایک سال کے لیے بڑھا دیا گیا تھا۔ 23 دسمبر کو ہوئی مرکزی کابینہ کی میٹنگ کے بعد خوردنی معاملوں کے وزیر پیوش گویل نے کہا تھا کہ قومی فوڈ سیکورٹی قانون کے تحت غریبوں کو مفت میں اناج مہیا کرایا جائے گا۔

واضح رہے کہ کووڈ-19 وبا کے دوران غریبوں کو مفت اناج تقسیم کرنے کا مذکور بالا منصوبہ اپریل 2020 میں شروع ہوا تھا۔ مفت اناج منصوبہ کی مدت کار 31 دسمبر کو ختم ہو رہی تھی، جسے بڑھانے کا فیصلہ کابینہ میٹنگ مین کیا گیا تھا۔ بہرحال، مودی کابینہ کی مزید ایک میٹنگ گزشتہ 4 جنوری کو بھی ہوئی تھی۔ اس میٹنگ میں بھی کچھ اہم فیصلے لیے گئے تھے۔ میٹنگ کے بعد مرکزی وزیر انوراگ ٹھاکر نے نیشنل گرین ہائیڈروجن کو مرکزی کابینہ سے منظوری ملنے کی جانکاری بھی دی تھی۔