حسینہ عالم 2023: ہندوستان میں منعقد ہوگا 71واں مس ورلڈ بیوٹی پیجنٹ، 130 سے زائد ممالک کی حسیناؤں کی آمد متوقع

27 سال بعد ہندوستان ایک بار پھر حسینہ عالم مقابلے کا گواہ بنے گا۔ جمعرات کے روز گزشتہ سال کی حسینہ عالم کیرولینا بیلاسکا نے نئی دہلی میں ایک پریس کانفرنس کے دوران یہ اعلان کیا۔ انھوں نے کہا کہ مس ورلڈ 2023 بیوٹی پیجنٹ تقریب کا انعقاد ہندوستان میں ہوگا۔ پریس کانفرنس میں مس ورلڈ آرگنائزیشن کے چیئرپرسن اور سی ای او جیا مورلے بھی موجود تھے۔

بتایا جاتا ہے کہ حسینہ عالم کے مقابلے میں شامل ہونے کے لیے 130 سے زیادہ ممالک کی امیدوار ہندوستان پہنچیں گی اور یہاں وہ اپنے ہنر اور سمجھداری کا مظاہرہ پیش کریں گی۔ اس دوران یہ تمام امیدوار کئی مراحل سے گزریں گی، جن میں ٹیلٹ شو کیس، اسپورٹس کے چیلنجز اور چیرٹی (امداد) سے جڑی چیزیں ہوں گی۔ امیدواروں کو شارٹ لسٹ ہونے کے لیے ایک ماہ میں کئی راؤنڈس سے ہو کرگزرنا ہوگا۔

قابل ذکر ہے کہ دنیا کی سب سے بڑی تقاریب میں سے ایک مس ورلڈ بیوٹی پیجنٹ 27 سال بعد ہندوستان میں ہونے جا رہا ہے۔ اس سے قبل 1996 میں اسے ہندوستان میں منعقد کیا گیا تھا۔ جہاں تک ہندوستان کی حسینہ عالم کا سوال ہے تو پہلی بار 1966 میں ریتا فاریہ پہلی ہندوستانی تھیں جنھیں حسینہ عالج کا تاج ملا تھا۔ ہندوستانی امیدواروں کو اب تک اس مقابلے میں 6 مرتبہ کامیابی ملی ہے۔