نگروٹہ میں مارے گئے ملی ٹنٹ انتخابات میں رخنہ ڈالنے کا ارادہ رکھتے تھے: آئی جی پی کشمیر

سری نگر: کشمیر زون پولیس کے انسپکٹر جنرل وجے کمار نے کہا کہ جموں کے نگروٹہ علاقے میں مارے گئے ملی ٹنٹ وادی کشمیر میں ڈسٹرکٹ ڈیولپمنٹ کونسل (ڈی ڈی سی) کے انتخابات میں رخنہ ڈالنے کا ارادہ رکھتے تھے۔ انہوں نے کہا کہ ہر ایک امیدوار کو سیکورٹی فراہم کرنا مشکل ہے تاہم ہر ایک کو سیکورٹی زون میں رکھا جا رہا ہے۔ جب وہ انتخابی مہم چلانے کے لئے جاتے ہیں تو انہیں ڈبل اسکارٹ فراہم کیا جاتا ہے۔

وجے کمار نے یہ باتیں جمعرات کو یہاں ایک سپورٹس تقریب کے حاشیے پر نامہ نگاروں کے سوالات کا جواب دیتے ہوئے کہیں۔ انہوں نے نگروٹہ تصادم کے بارے میں پوچھے جانے پر کہا کہ 'پچھلے کچھ دنوں سے پاکستان دراندازی کرنے کی بہت کوششیں کر رہا ہے۔ الیکشن چل رہا ہے جس کی تیاریاں کی جا رہی ہیں۔ وہ انتخابی سرگرمیوں میں خلل ڈالنے کی کوششیں کر رہے ہیں۔ سیکورٹی فورسز نے بہترین تال میل سے چاروں ملی ٹنٹوں کو ہلاک کر دیا ہے۔ ان کا ارادہ کشمیر آ کر انتخابات میں رخنہ ڈالنا تھا'۔

آئی جی پی نے کہا کہ ہم انتخابی امیدواروں کو بھی سیکورٹی فراہم کر رہے ہیں جنہوں نے بقول ان کے انتخابی مہم چلانا بھی شروع کر دی ہے۔ ان کا کہنا تھا کہ 'ہم انتخابات کے لئے تیاری کر رہے ہیں۔ جموں و کشمیر پولیس اور دیگر سیکورٹی فورسز پوری طرح سے تیار ہیں۔ ہم انتخابی امیدواروں کو بھی سیکورٹی فراہم کر رہے ہیں۔ امیدواروں نے انتخابی مہم چلانا بھی شروع کر دی ہے۔ کوئی ڈرنے کی بات نہیں ہے'۔

وجے کمار نے جنوبی ضلع پلوامہ کے کاکہ پورہ میں گزشتہ شام ہونے والے گرینیڈ حملے کے بارے میں پوچھے جانے پر کہا کہ 'پلوامہ میں ایک بدقسمت واقعہ پیش آیا۔ ملی ٹنٹوں کا ہدف پولیس اور سی آر پی ایف تھی'۔ انہوں نے کہا کہ 'گرینیڈ شہریوں کے بیچوں بیچ گر گیا جس کے نتیجے میں 12 عام شہری زخمی ہوئے۔ چار زخمیوں کو سری نگر منتقل کیا گیا تھا جن کی حالت خطرے سے باہر ہے۔ ہمیں معلوم ہوا ہے کہ یہ گرینیڈ کس نے پھینکا ہے۔ جس نے پھینکا ہے اس کو بہت جلد پکڑ لیں گے'۔

یہ پوچھے جانے پر کہ کیا بی ڈی سی انتخابات کے پیش نظر حملوں میں اضافہ دیکھنے کو مل سکتا ہے تو آئی جی پی کا کہنا تھا کہ 'انتخابات ہوں یا 15 اگست یا 26 جنوری یا کسی وی وی آئی پی کا دورہ کشمیر اس وقت حملے کا خدشہ موجود ہوتا ہے۔ مگر ہم کسی بھی صورتحال سے نمٹنے کے لئے تیار ہیں'۔ انہوں نے ایک اور سوال کے جواب میں کہا کہ 'لانچنگ پیڈس پر 200 سے 250 ملی ٹنٹ سرحد کے اس پار دراندازی کرنے کے لئے تیار بیٹھے ہیں۔ مگر سیکورٹی فورسز پوری طرح سے مستعد ہیں۔ ان کی کسی بھی کوشش کو ناکام بنایا جائے گا'۔