گروگرام میں میٹرو کی توسیع کو ملی منظوری، 28.5 کلو میٹر طویل راستے میں تیار ہوں گے 27 اسٹیشن

گروگرام کے باشندوں کے لیے ایک بڑی خوشخبری سامنے آئی ہے۔ گروگرام میں میٹرو کنکٹیویٹی کو توسیع کو منظوری مل گئی ہے۔ مرکزی کابینہ نے بدھ کے روز ہاؤسنگ اور اَربن افیئرس منسٹری کی تجویز پر اپنی آخری مہر لگا دی۔ اس کے ساتھ ہی شہر میں میٹرو کی توسیع کا راستہ صاف ہو گیا۔ میٹرو کنکٹیویٹی کی توسیع ہڈا سٹی سنٹر اور سائبر سٹی کے درمیان ہوگی۔ یہ 28.5 کلومیٹر طویل راستہ کا احاطہ کرے گا۔

بتایا جاتا ہے کہ اس راستہ پر 27 نئے میٹرو اسٹیشن ہوں گے۔ مرکزی وزیر پیوش گویل نے کہا کہ ہریانہ میٹرو کنکٹیویٹی پروجیکٹ پر مجموعی خرچ 5453 کروڑ روپے آئے گا۔ اس کے تیار ہونے میں چار سال کا وقت لگے گا۔ گروگرام میٹرو میں اس توسیع سے 31-2030 تک 17 لاکھ لوگوں کو روزگار ملنے کا اندازہ بھی ظاہر کیا گیا ہے۔

گروگرام میٹرو میں توسیع کی اس منظوری سے اولڈ گروگرام کے لوگوں کو بہت فائدہ پہنچنے والا ہے۔ دراصل اولڈ گروگرام میں ابھی تک کوئی میٹرو لائن نہیں ہے۔ اولڈ گروگرام اب نیو گروگرام سے جڑ جائے گا اور یہ نیٹورک ریلوے اسٹیشن کو بھی جوڑے گا۔ آئندہ فیز میں یہ آئی جی آئی ایئرپورٹ کو بھی جوڑے گا۔ اس سے معاشی ترقی میں بھی رفتار ملے گی۔

آئیے اب جانتے ہیں کہ ہڈا سٹی سنٹر اور سائبر سٹی کے درمیان تیار ہونے والے اس میٹرو روٹ میں جو 27 اسٹیشن ہوں گے ان کے نام کیا ہوں گے۔ اسٹیشنوں کے نام اس طرح ہیں: ہڈا سٹی سنٹر، سیکٹر 45، سائبر پارک، سیکٹر 47، سبھاش چوک، سیکٹر 48، سیکٹر 72 اے، ہیرو ہونڈا چوک، ادیوگ وِہار فیز 6، سیکٹر 10، سیکٹر 37، بسئی گاؤں، سیکٹر 101، سیکٹر 9، سیکٹر 7، سیکٹر 4، سیکٹر 5، اشوک وِہار، سیکٹر 3، کرشنا چوک، پالم وِہار ایکسٹینشن، پالم وِہار، سیکٹر 23 اے، سیکٹر 22، اُدیوگ وِہار فیز 4، اُدیوگ وِہار 5، سائبر سٹی۔