رکن پارلیمنٹ گنیش مورتی کا دورۂ قلب سے انتقال، چند روز قبل کی تھی خودکشی کی کوشش

رکن پارلیمنٹ اے. گنیش مورتی کا آج صبح اسپتال میں علاج کے دوران انتقال ہو گیا۔ مروملارچی دراوڑ منیتر کژگم (ایم ڈی ایم کے) لیڈر کی طبیعت خراب ہونے پر جمعرات کی علی الصبح انھیں اسپتال لے جایا گیا، لیکن علاج کے دوران دل کا دورہ پڑنے سے ان کا انتقال ہو گیا۔ چند روز قبل کی ہی بات ہے جب انھوں نے جراثیم کش دوا کھا کر خودکشی کی کوشش کی تھی، لیکن وقت رہتے انھیں بچا لیا گیا تھا۔ حالانکہ تب سے ہی وہ بہتر محسوس نہیں کر رہے تھے۔

میڈیا رپورٹس کے مطابق 76 سالہ گنیش مورتی کا تمل ناڈو واقع کوئمبٹور کے ایک پرائیویٹ اسپتال میں علاج چل رہا تھا اور صبح تقریباً 5 بجے انھوں نے آخری سانس لی۔ کچھ خبروں میں بتایا جا رہا ہے کہ ایروڈ سے 2019 کے لوک سبھا انتخاب میں ڈی ایم کے کے ٹکٹ پر منتخب گنیش مورتی کی 24 مارچ کو طبیعت بگڑی تھی اور انھوں نے بے چینی و الٹی کی شکایت کی تھی۔ اس کے بعد گھر والوں نے انھیں فوراً ایروڈ کے ایک پرائیویٹ اسپتال میں داخل کرایا۔ بعد ازاں خبریں سامنے آئی تھیں کہ انھوں نے خودکشی کی کوشش میں جراثیم کش دوا پی لی تھی۔

گنیش مورتی کے انتقال کی خبر پر ایم ڈی ایم کے ترجمان نے میڈیا کو جانکاری دیتے ہوئے بتایا کہ ڈاکٹروں نے اس امکان کے بارے میں پہلے ہی آگاہ کر دیا تھا۔ تین بار کے رکن پارلیمنٹ گنیش مورتی کے انتقال کی خبر پر اب تعزیت کا سلسلہ شروع ہو گیا ہے اور ان کے چاہنے والوں میں غم و اندوہ کی لہر پھیل گئی ہے۔ بہرحال، گنیش مورتی کی لاش کو پوسٹ مارٹم کے لیے ایروڈ کے پیروندورئی کے ایک سرکاری اسپتال لے جایا گیا۔ مقامی پولیس کا کہنا ہے کہ گنیش مورتی کے ذریعہ مبینہ خودکشی کی کوشش اور ان حالات کی جانچ کر رہی ہے۔