محبوبہ مفتی کو باغیانہ بیان بازی پر گرفتار کیا جانا چاہیے: وی ایچ پی

جموں: وشو ہندو پریشد جموں و کشمیر یونٹ کے صدر لیلا کرن شرما نے پی ڈی پی صدر محبوبہ مفتی کو ایک حالیہ بیان پر ہدف تنقید بناتے ہوئے کہا ہے کہ محبوبہ مفتی کو باغیانہ بیانات دینے کے پاداش میں گرفتار کیا جانا چاہیے۔ بتادیں کہ محبوبہ مفتی نے یہاں ایک پریس کانفرنس کے دوران مبینہ طور پر کہا تھا کہ وادی میں نوجوان جیل جانے کی بجائے بندوق اٹھانے کو ترجیح دے رہے ہیں۔

لیلا کرن شرما نے محبوبہ مفتی کے اس بیان پر ردعمل ظاہر کرتے ہوئے منگل کے روز یہاں نامہ نگاروں کو بتایا کہ 'ہم محبوبہ مفتی کے بیان کی مذمت کرتے ہیں، یہ ایک باغیانہ بیان ہے، ان کے خلاف کارروائی کی جانی چاہیے اور انہیں جیل بھیج دیا جانا چاہیے'۔ انہوں نے کہا کہ محبوبہ مفتی نے اس سے پہلے ایک بیان میں کہا تھا کہ کشمیر میں جھنڈا اٹھانے والا کوئی نہیں رہے گا لیکن آج وہاں جھنڈا بھی اٹھایا جاتا ہے اور اس کے لئے قربانیاں بھی دی جا رہی ہیں۔

لیلا کرن شرما نے کہا کہ محبوبہ مفتی اب جموں میں آکر ایسے بیانات دے رہی ہیں جن سے جموں منتشر ہوگا۔ انہوں نے کہا کہ پی ڈی پی صدر کشمیر میں غیر متعلق ہوگئی ہیں اور جموں وکشمیر کے لوگ پکے نیشنلسٹ ہیں اور وہ قومی دھارے میں رہنا چاہتے ہیں۔