لاک ڈاون میں جشن عید میلادالنبی ؐکیسے منایا جائےگا ؟

لاک ڈاون میں جشن عید میلادالنبی ؐ کس طرح منایا جائے اور جلوس میلادالنبی ؐکی کیا شکل ہونی چاہئے اس بارے میں آل انڈیا خلافت کمیٹی کے کارگزار چیئرمین سرفراز آرزو کی قیادت میں ایک مشاورتی میٹنگ خلافت ہاوس بائیکلہ میں منعقد ہوئی جس میں موجودہ حالات کا جائزہ لیا گیا اور حکومت مہاراشٹر سے اس بارے میں گائیڈ لائنس جاری کرنے کے لئے کہا گیا ۔

شرکائے میٹنگ میں موجودہ حالات کے پس منظر میں جلوس عید میلادالنبی ؐکو محدود پیمانے پر نکالنے کا مشورہ دیا اور ایسے مطالبات مرتب کئے جن کو مہاراشٹر سرکار اپنی گائیڈ لائنس کا حصہ بنا سکے ۔یہ طئے پایا کہ جہاں ہر سال سیکڑوں کی تعداد میں ٹرک اس جلوس میں شرکت کرتے ہیں وہیں اس سال ان کی تعداد کو 500؍تک محدود کر دیا جائے اور ہر ٹرک میں 10؍سے زیادہ لوگوں کو سوار نہ کیا جائے ۔ ٹیمپو میں 5؍لوگوں کو سفر کی اجازت ہو ۔ موٹر کاروں میں ڈرائیور کے علاوہ 3؍لوگوں کوشرکت کی اجازت ہو اور ٹو وہیلر اور دو پہیہ گاڑیوں کا زیادہ سے زیادہ استعمال کرنے کی اجازت دی جائے ۔

جلوس میں شریک گاڑیوں پر جھنڈے لگائے جائیں تا کہ ان کی الگ پہچان بن سکے ۔اس کے علاوہ جو استقبالی اسٹیج جلوس کے راستے میں لگائے جاتے ہیں انہیں حسب سابق اجازت دی جائے لیکن ان پر بھیڑ بھاڑ نہ کی جائے۔جلوس کے شرکا ٔ ماسک پہن کر آئیں اور کورونا کی گائیڈ لائنس پر سختی سے عمل درآمد کریں ۔اس کے بعد شوشل ڈسٹینسنگ کے تقاضہ پورے کرتے ہوئےخلافت ہاوس بائیکلہ میں جلوس کے افتتاحی جلسہ کا اہتمام کرنے کی بھی اجازت ہو ۔ ان مطالبات کو لیکر ریاستی وزیر داخلہ انل دیشمکھ سے ایک نمائندہ وفد وزارت کے سکریٹری اور افسران کی موجودگی میں ملاقات کرے گا تا کہ گائیڈ لائنس کے اجرا ٔ پر تبادلہ خیال کے بعد مناسب احکامات مرتب کیئے جائیں ۔

میٹنگ کے شرکا ٔ کا خیال تھا کہ ان کے جلوس کیلئے حکومت محدود پیمانے پر ہی سہی اجازت ضرور دے ورنہ عوام اپنے طور پر اگر جلوس نکالیں گے تو اس سے بدنظمی کا خدشہ رہے گا ۔اس میٹنگ میں مسلم کونسل کے صدر ابراہیم طائی ،عمر لکڑاوالا ، سہیل صبیدار ،ایوب میمن ،نبی اختر قریشی ، امین سلایا ، محمد علی رضوی ، شیر خان اور دیگر سماجی کارکنان نے شرکت کی ۔