جمعیت اہل حدیث ممبئی کے نائب صدر مولانا مقیم فیضی کا انتقال ایک عظیم دینی وعلمی خسارہ

ممبئی: معروف عالم دین، مرکزی جمعیت اہل حدیث ہند کے سابق نائب ناظم، ممبئی صوبائی جمعیۃ اہل حدیث کے نائب صدر مولانا محمد مقیم فیضی کا گزشتہ رات انتقال ہوگیا، ٹھیک بارہ بجے دن میں ممبئی سے متصل شہر ممبرا میں ان کی نماز جنازہ ادا کی گئی، نماز جنازہ صوبائی صدر مولانا عبدالسلام سلفی کی امامت میں اداکی گئی اور کوسہ ممبرا کے نئے قبرستان میں جماعت وجمعیت اہل حدیث کی سرکردہ شخصیات، اہل علم اور اعیان شہر نے انہیں سپرد خاک کیا، ان کے پسماندگان میں کئی بچے اور بچیاں ہیں، مولانا ممبرا میں مقیم تھے، آپ کا آبائی وطن یوپی کا مشہور ضلع پرتاپ گڈھ ہے۔

مولانا محمد مقیم فیضی کے سانحہ وفات اور انتقال پر ملال پر رنج وافسوس اور دکھ کا اظہار کرتے ہوئے جامع مسجد اہل حدیث کے امام وخطیب اور ممبئی یونٹ رابطہ ابنائے قدیم سنابل نئی دہلی کے صدر مولانا عاطف سنابلی نے کہا کہ مولانا مقیم فیضی صاحب کا انتقال ملک وملت اور جماعت وجمعیت کے لئے ایک عظیم سانحہ اور حادثہ سے کم نہیں ہے، آپ کے جانے سے تنظیم وجماعت میں ایک خلا پیدا ہوگیا ہے، آپ کی شخصیت علمی وتنظیمی دنیا کی ایک ممتاز ومعروف شخصیت تھی، آپ کے اندر دینی حمیت اور مسلکی ومنہجی غیرت بدرجہ اتم موجود تھی، آپ ایک دردمند وفکرمند اور سنتوں کے پابندوشیدائی تھے آپ ایک صاحب طرز خطیب اور اچھے قلمکار تھے۔

مولانا سنابلی نے مزید کہا کہ مولانا مقیم تقریروں میں امت کا درد اور سوز اور تڑپ ہوتی تھی ان کی زندگی کا بیشتر حصہ دین اسلام کی خدمت اور منہج ومسلک کی ترویج واشاعت اور استحکام میں گزاری، آپ ایک بہترین منتظم اور مہتمم بھی تھے، آپ کے اندر تںظیمی صلاحیت کوٹ کوٹ کر بھری تھی۔