مشہور سماجوادی رہنما ملائم سنگھ یادو کے انتقال پر جمعیۃ علماء ہند کے صدر مولانا محمود مدنی کا اظہار رنج و غم

جمعیۃ علماء ہند کے صدر مولانا محمود اسعد مدنی نے مشہور سماجوادی رہنما ملائم سنگھ یادو کے انتقال پر گہرے صدمے کا اظہار کیا ہے۔ انھوں نے ملائم سنگھ کے صاحبزادے اور سماجوادی پارٹی کے صدر اکھیلیش یادو کے ساتھ اس دکھ کی گھڑی میں یکجہتی کا اظہار کیا۔ مولانا مدنی نے کہا کہ ملائم سنگھ یادو سوشلسٹ اور سیکولر رہنما تھے۔ انھوں نے زمینی سطح پر مظلوم طبقات کے لیے کام کیا اور ان کی امیدوں کا مرکز بنے۔ انھوں نے اپنے دور اقتدار میں فرقہ پرستی اور فاشزم خیالات کی حامل طاقتوں سے مقابلہ کیا اور کثرت میں وحدت کی حفاظت کی۔ ان کی وفات سے ملکی سیاست میں ایک بڑا خلا پیدا ہوا ہے۔

قابل ذکر ہے کہ پیر کی صبح تقریباً سوا آٹھ بجے ملائم سنگھ یادو کا گروگرام کے میدانتا اسپتال میں انتقال ہو گیا۔ اس خبر کے پھیلتے ہی مختلف شعبہ حیات سے تعلق رکھنے والے لوگوں کے ذریعہ تعزیتی پیغامات کا سلسلہ شروع ہو گیا۔ آل انڈیا مسلم مجلس مشاورت کے صدر نوید حامد نے ملائم سنگھ کے انتقال پر بذریعہ ٹوئٹ تعزیت پیش کرتے ہوئے لکھا کہ "ملائم سنگھ یادو کو ہندوستان کے ایک حقیقی فرزند کے طور پر یاد کیا جائے گا۔ انھوں نے بطور وزیر دفاع چین کی توسیع پسندانہ پالیسی کے شیطانی عزائم سے خبردار کیا تھا۔ یوپی کے وزیر اعلی کے طور پر بھی انھوں نے ایک ممتاز نشان چھوڑا۔ وہ ایک ایسے لیڈر رہے جن کے سیاسی مخالفین بھی ان کی عزت کرتے تھے۔"