دہلی پولیس میں بڑے پیمانے پر تبادلے، 55 تھانیدار تبدیل، 8 خاتون انسپکٹر ایس ایچ او مقررر

نئی دہلی: دہلی پولیس نے بڑے پیمانے پر تبادلہ کرتے ہوئے 114 انسپکٹروں کو تبدیل کر دیا۔ انڈین پولیس سروس کے گجرات کیڈر کے افسر راکیش استھانہ کے دہلی پولیس کمشنر کا عہدہ سنبھالنے کے بعد مسلسل بڑے پیمانے پر تبادلے کیے جا رہے ہیں۔ اس سے قبل انہوں نے دارالحکومت کے کئی اضلاع کی کمان خواتین پولیس افسران کو سونپی تھی۔

تبادلوں کے علاوہ پولیس کنٹرول روم کی گاڑیاں اور ان کے پولیس اہلکار کو تھانوں کے ساتھ منسلک کردیا تھا ۔ اب پولیس کنٹرول روم کے پولیس اہلکارمقامی سطح پر امن و امان کی نگرانی میں تعاون کر رہے ہیں۔

پولیس ہیڈ کوارٹرکی جانب سے جاری کردہ حکم کے مطابق جن انسپکٹروں کے تبادلے کیےگئے ہیں، ان میں 55 تھانہ افسر (ایس ایچ اوز) شامل ہیں۔ انسپکٹروں میں 44 ایسے ہیں ، جنہیں پہلی بار تھانے کی کمان سونپی گئی ہے۔ آٹھ خواتین انسپکٹروں کو ایس ایچ اوز بنایا گیا ہے ۔ دارالحکومت کے تھانوں کے 34 انسپکٹرپانچ سال یا اس سے زیادہ وقت سے تعینات تھے۔ انہیں الگ الگ پوسٹ پر تعینات کیا گیا ہے۔ سکیورٹی پرانچ میں 18 انسپکٹراور پولیس ٹریننگ کالج میں 8 انسپکٹر بھیجے گئے ہیں۔

وہیں، 8 خاتون پولیس انسپکٹروں کی بھی ایس ایچ او کے طور پر تقرری کی گئی ہے۔ ایسا پہلی بار ہوا ہے جب دہلی پولیس میں ایک ساتھ اتنے بڑے پیمانے پر خاتون پولیس انسپکٹروں کو ایس ایچ او کے عہدے پر فائز کیا گیا ہے۔ فی الحال دہلی کے 9 تھانہ ایسے ہیں جن کی ایس ایچ او خواتین ہیں۔

بتایا جاتا ہے کہ تقریبا 12 ایسے ایس ایچ اوز کے تبادلے کئے گئے ہیں جن کا کام کاج تسلی بخش نہیں تھا۔ دہلی پولیس کے ذرائع نے بتایا کہ گزشتہ ایک ماہ کے دوران 79 ایس ایچ اوز کو تبدیل کیا گیا ہے۔ ان کی جگہ 65 انسپکٹروں کو پہلی بار تھانوں کی کمان دی گئی ہے۔