ہماچل پردیش: مرکزی حکومت کی پالیسیوں کے خلاف کانگریس کا زبردست احتجاجی مارچ

ریاستی حکومت کو بی جے پی کے ذریعے غیرمستحکم کرنے کی کوشش کے خلاف ریاست کی راجدھانی شملہ میں کانگریس نے زبردست احتجاجی مارچ نکالا۔ اس مارچ میں ہماچل پردیش کے وزیر اعلیٰ سکھوندر سنگھ سکھو، ان کی کابینہ کے وزرا اور ریاستی کانگریس کی صدر پرتبھا سنگھ بھی شامل ہوئیں۔

ہماچل پردیش کانگریس کمیٹی کے ذریعے نکالا گیا یہ احتجاجی مارچ تاریخی رج میدان میں مہاتما گاندھی کے مجسمہ سے شروع ہوا اور امبیڈکر چوک پر ختم ہوا۔ اس دوران وزیر اعلیٰ سکھو نے مظاہرین سے خطاب کرتے ہوئے کہا کہ بی جے پی نے ہماچل پردیش میں کانگریس کو دیے گئے عوامی مینڈیٹ کو نظر انداز کرتے ہوئے ’غیر اخلاقی اور غیر جمہوری‘ طریقے سے ریاست میں کانگریس کی حکومت کو گرانے کی کوشش کی۔ انہوں نے الزام لگایا کہ مرکزی حکومت کی طرف سے جمہوری طور پر منتخب ریاستی حکومت کو غیر آئینی طریقے سے نشانہ بنایا گیا۔ انہوں نے زور دے کر کہا کہ ریاستی حکومت اپنی پانچ سالہ مدت پوری کرے گی اور ریاست کے عوام کی خدمت کرتی رہے گی۔

اس مارچ کے بارے میں ’ایکس‘ پر معلومات دیتے ہوئے وزیر اعلی سکھویندر سنگھ سکھو نے لکھا ہے کہ ’’پیسے کی طاقت کے خلاف عوام کی جنگ اور جھوٹ کے خلاف سچ کی مشعل روشن ہوچکی ہے۔ آج شملہ کے رج میدان تک مرکز کی بی جے پی حکومت کے ذریعے جمہوریت پر کیے جا رہے حملوں و پیسوں کی طاقت کے ذریعے عوامی مینڈیٹ کو کچلنے کی کوشش کے خلاف نکالے گئے جلوس میں حصہ لیا۔ ہماچل کی جمہوریت کی روایت اور ہماچل واسیوں کے مینڈیٹ پر حملہ برداشت نہیں کیا جائے گا۔‘‘