مراٹھا ریزرویشن: منوج جرانگے پاٹل کی بھوک ہڑتال 9 دن بعد ختم، 24 ستمبر کو بگڑ گئی تھی طبیعت

مراٹھا ریزرویشن کے لیے بار بار بھوک ہڑتال کرنے والے سماجی کارکن منوج جرانگے پاٹل نے ایک بار پھر اپنی بھوک ہڑتال کو ختم کرنے کا اعلان کر دیا ہے۔ وہ دیگر پسماندہ طبقہ (او بی سی) زمرہ کے تحت اپنے طبقہ کو ریزرویشن دینے کا مطالبہ کرتے ہوئے گزشتہ 9 دنوں سے غیر معینہ مدت کی بھوک ہڑتال پر تھے۔ منگل (24 ستمبر) کے روز ان کی طبیعت بھی بگڑ گئی تھی لیکن انھوں نے بھوک ہڑتال ختم کرنے سے انکار کر دیا تھا۔ حالانکہ اب انھوں نے اپنے حامیوں کی خصوصی گزارش پر بھوک ہڑتال ختم کر دیا ہے۔

بھوک ہڑتال ختم کرنے کا اعلان کرتے ہوئے منوج جرانگے پاٹل نے جالنہ ضلع کے اپنے آبائی گاؤں انتروالی سرتی میں حامیوں سے خطاب کیا۔ اس دوران انھوں نے کہا کہ مراٹھا طبقہ کے جذبات کو دھیان میں رکھتے ہوئے وہ بھوک ہڑتال ختم کر رہے ہیں۔ ساتھ ہی انھوں نے یہ بھی کہا کہ ’’ہم ان لوگوں سے نمٹیں گے جنھوں نے مراٹھا طبقہ کو ٹھیس پہنچائی ہے۔‘‘

اس سے قبل 24 ستمبر کو مقامِ احتجاج پر جمع مراٹھا طبقہ کے اراکین کی اپیل کے باوجود منوج جرانگے نے جوس یا دوا لینے سے انکار کر دیا تھا۔ انھوں نے 17 ستمبر کو غیر معینہ مدت کی یہ بھوک ہڑتال شروع کی تھی۔ ایک سال سے کچھ زائد عرصہ میں یہ ان کی چھٹی بھوک ہڑتال تھی، لیکن اب یہ ہڑتال بھی ختم کرنے کا اعلان ہو چکا ہے۔