منی پور تشدد: وزیر کی ہتھیار لوٹنے والوں سے درخواست، ’براہِ کرم لوٹے ہوئے ہتھیار ڈراپ باکس میں ڈال دیں!‘

امپھال: حالیہ نسلی تشدد کے دوران سیکورٹی فورسز سے ہتھیار لوٹنے والوں کو گمنام طور پر ہتھیار جمع کرنے میں مدد کے لیے منی پور کے پبلک ہیلتھ انجینئرنگ کے وزیر لیشانگ تھیم سوسیندرو میتئی کی رہائش گاہ کے سامنے ایک بڑا ڈراپ باکس نصب کیا گیا ہے۔ رپورٹ کے مطابق اب تک 130 اسلحہ اور بھاری مقدار میں گولہ بارود جمع کیا جا چکا ہے۔

وزیر نے کہا کہ یہ باکس جدید ترین خودکار رائفلوں سمیت لوٹے گئے ہتھیاروں کو نامعلوم طور پر جمع کرنے کی سہولت سے فائدہ اٹھانے کے لیے قائم کیا گیا تھا۔ وزیر کے گھر کے باہر ایک ڈھکے ہوئے شیڈ میں ایک بڑے پوسٹر پر انگریزی اور میتئی دونوں زبانوں میں لکھا ہوا ہے ’’براہ کرم اپنے لوٹے ہوئے ہتھیار یہاں چھوڑ دیں۔ بلاجھجک ایسا کریں۔‘‘

امپھال ایسٹ سے بی جے پی ایم ایل اے سوسیندرو نے اپنے حلقے کا دورہ کرتے ہوئے نوجوانوں اور گاؤں والوں کو ہتھیار ڈالنے اور قیام امن میں شامل ہونے پر آمادہ کیا۔ نہوں نے کہا کہ کچھ نوجوان جن کے پاس ہتھیار ہیں وہ پولیس کے خوف سے اپنے ہتھیار واپس کرنے سے کتراتے ہیں، اسی لیے یہ گمنام باکس لگایا گیا ہے۔

قبل ازیں، مرکزی وزیر داخلہ امت شاہ اور وزیر اعلیٰ این بیرن سنگھ لوگوں سے ہتھیار ڈالنے کی اپیل کر چکے ہیں۔ انہوں نے کہا کہ اگر لوگ رضاکارانہ طور پر ہتھیار ڈال دیتے ہیں تو ان کے خلاف کوئی قانونی کارروائی نہیں کی جائے گی۔ مختلف نیم فوجی دستے اور منی پور پولس لوٹے گئے ہتھیاروں کی بازیابی کے لیے گزشتہ 9 دنوں سے ریاست بھر میں تلاشی مہم چلا رہی ہے۔

دفاعی ذرائع نے بتایا کہ مقامی لوگوں کو غیر ضروری مشکلات سے بچنے کے لیے ایگزیکٹو مجسٹریٹس کے ساتھ آپریشن جاری رہا۔ ذرائع نے بتایا کہ گزشتہ 24 گھنٹوں کے دوران مختلف اضلاع سے مجموعی طور پر 22 ہتھیار برآمد کیے گئے جن میں زیادہ تر خودکار تھے۔ میڈیا رپورٹس میں دعویٰ کیا گیا کہ 3 مئی کو فسادات پھوٹنے کے بعد ہجوم نے کئی تھانوں اور سیکورٹی کیمپوں سے ہزاروں مختلف قسم کے ہتھیار اور بڑی مقدار میں گولہ بارود لوٹ لیا تھا۔