کولمبیا: اڑتے طیارہ میں ہوئی مسافر کی موت، پیٹ سے نکلے منشیات کے 246 پیکٹ

جاپانی نژاد ایک شخص کی موت اڑتے طیارہ میں ہو گئی جس کے بعد طیارہ میں ایک ہنگامہ سا برپا ہو گیا۔ فوری طور پر طیارہ کی ایمرجنسی لینڈنگ کرائی گئی اور پھر مہلوک مسافر کا پوسٹ مارٹم کیا گیا۔ اس کے بعد جو کچھ سامنے آیا وہ حیران کرنے والا تھا۔ جانچ کے بعد پتہ چلا کہ اس کے پیٹ میں کئی ساری کوکین (منشیات) کی تھیلیاں تھیں۔ میڈیا ذرائع کے مطابق پوسٹ مارٹم کے دوران پیٹ سے تقریباً 246 پیکٹ منشیات کے برآمد ہوئے۔ بتایا جاتا ہے کہ یہ کوکین اسمگلنگ کے مقصد سے لے جا ئی جا رہی تھی لیکن اس شخص کی موت طیارے میں ہی ہو گئی۔

خبروں کے مطابق 42 سالہ اس ہلاک شخص کا نام یوڈو ہے جو کولمبیا سے جاپان کا سفر کر رہا تھا۔ اس نے منشیات کے پیکٹ اپنے پیٹ میں چھپا رکھے تھے تاکہ اس کی خبر کسی کو نہ مل سکے۔ پیٹ اور آنت میں یوڈو نے یہ پیکٹ کچھ اس طرح سے چھپا رکھے تھے کہ پتہ لگاپانا کسی کے لیے بھی بہت مشکل تھا۔ افسران کے مطابق جب فلائٹ ہوا میں تھی تبھی اس کی موت ہو گئی جس کے بعد طیارہ کی ایمرجنسی لیڈنگ ناردرن میکسیکو کے سونورا علاقہ میں کرائی گئی۔

قابل ذکر ہے کہ اسمگلنگ سے متعلق پہلے بھی کئی بار ائیر پورٹ پولس کئی لوگوں کو گرفتار کر چکی ہے، لیکن اس طرح کے معاملے برابر پیش آتے رہتے ہیں۔ لوگ اسمگلنگ کے لیے الگ الگ اور نئے نئے طریقے اختیار کرتے ہیں جس سے کبھی کبھی انھیں پکڑنا پولس کے لیے مشکل ہو جاتا ہے۔

غور طلب ہے کہ سال 2017 میں ڈیلٹا ائیر لائنس کے دو مسافروں کو بھی منشیات کی اسمگلنگ کے الزام میں گرفتار کیا گیا تھا۔ جانچ افسران نے دونوں مسافروں کے پاس سے 23 پاؤنڈ منشیات برآمد کی تھی۔