ملکارجن کھڑگے نے بطور کانگریس صدر 2 سال کیے مکمل، راہل گاندھی و دیگر لیڈران نے پیش کی مبارکباد

ملکارجن کھڑگے نے آج کانگریس صدر کے طور پر اپنے 2 سال مکمل کر لیے ہیں۔ اس موقع پر لوک سبھا میں حزب اختلاف کے لیڈر راہل گاندھی انھیں مبارکباد پیش کرنے دہلی واقع ان کی رہائش پر پہنچے۔ راہل گاندھی کے ساتھ کانگریس کے کچھ دیگر سرکردہ لیڈران بھی تھے جنھوں نے پھولوں کا گلدستہ پیش کر کھڑگے کو مبارکباد اور نیک خواہشات پیش کیں۔ اس دوران کھڑگے نے کیک بھی کاٹا۔

کانگریس نے ملکارجن کھڑگے کو 2 سالہ مدت کار مکمل کرنے پر مبارکباد پیش کرتے ہوئے سوشل میڈیا پر ایک پوسٹ بھی کیا ہے۔ اس میں پارٹی نے لکھا ہے کہ ’’ملکارجن کھڑگے نے کانگریس صدر کی شکل میں دو سال مکمل کر لیے ہیں۔ انھوں نے اٹوٹ عزائم، تجرکاری والی قیادت اور دانشمندی کے ساتھ قیادت کی ہے۔ سماجی انصاف اور جمہوریت کی انتھک حمایت، کھڑگے جی کا طلبا یونین لیڈر سے لے کر انڈین نیشنل کانگریس کے صدر عہدہ تک کا سفر قابل ترغیب ہے۔‘‘ پارٹی نے یہ بھی لکھا ہے کہ ’’ہندوستان کے سیکولر تانے بانے کو بنائے رکھنے اور مجموعی سیاست کو آگے بڑھانے کے لیے ان کے عزائم سبھی کے لیے امید کی شمع ہے۔ ان کی اثردار قیادت کے کئی اور سال کے لیے نیک خواہشات۔‘‘

راہل گاندھی نے بھی اپنے ’ایکس‘ ہینڈل پر ایک پوسٹ کیا ہے جس میں ملکارجن کھڑگے کے 2 سال ہونے پر مبارکباد اور نیک خواہشات پیش کی ہیں۔ انھوں نے لکھا ہے کہ ’’آپ کی قیادت نے پارٹی کے عوامی خدمات سے متعلق عزائم کو مضبوط کیا ہے۔ آپ کی جدوجہد اور تجربہ ہمیں ترغیب دیتا ہے۔ آئین اور عوام کے مفادات کی حفاظت کے لیے آپ کی رہنمائی ہر انصاف کے جنگجو کے لیے بیش قیمت ہے۔‘‘