لوک مت پارلیمنٹری ایوارڈس میں ملکارجن کھڑگے کو ملا لائف ٹائم اچیومنٹ ایوارڈ، کہا 'جب توپ مقابل ہو تو…'

راجدھانی دہلی میں آج 'لوک مت پارلیمانٹری ایوارڈس' کے چوتھے ایڈیشن کا انعقاد ہوا۔ اس میں کانگریس صدر اور راجیہ سبھا میں حزب مخالف لیڈر ملکارجن کھڑگے کو لائف ٹائم اچیومنٹ ایوارڈ سے سرفراز کیا گیا۔ تقسیم انعامات تقریب کے مہمانِ خصوصی ہندوستان کے سابق صدر رام ناتھ کووند نے کھڑگے کو یہ ایوارڈ پیش کیا۔ کھڑگے کو یہ ایوارڈ پارلیمنٹ کے دونوں ایوانوں میں ان کی بہترین مدت کار کے اعزاز میں دیا گیا ہے۔

دہلی کے این ڈی ایم سی کنونشن سنٹر میں منعقد لوک مت پارلیمنٹری ایوارڈس تقریب کو خطاب کرتے ہوئے کھڑگے نے جمہوریت میں صحافت اور اخبار کی اہمیت کو نشان زد کیا۔ انھوں نے اپنے خطاب کا آغاز لوک مت اخبار کی تاریخ سے کرتے ہوئے موجودہ وقت میں ملک کے تئیں اس کے تعاون کا تذکرہ کرتے ہوئے کیا۔ انھوں نے بتایا کہ لوک مت اخبار کا نام مجاہد آزادی بال گنگادھر تلک نے رکھا تھا۔

اپنے خطاب میں کھڑگے نے کہا کہ جمہوریت میں صحافت کی بہت زیادہ اہمیت ہے۔ انھوں نے اس دوران اکبر الٰہ آباد کا ایک شعر پڑھتے ہوئے اخبار اور صحافت کی طاقت کو نشان زد کیا۔ انھوں نے کہا کہ شاعر نے کہا تھا- کھینچو نہ کمانوں کو نہ تلوار نکالو، جب توپ مقابل ہو تو اخبار نکالو۔ انھوں نے کہا کہ یہ شعر بتاتا ہے کہ جمہوریت میں اخبار اور صحافت کی بہت بڑی اہمیت ہے۔

گزشتہ سال اکتوبر میں ہوئے انتخاب میں کانگریس کے قومی صدر منتخب ہوئے ملکارجن کھڑگے نے سیاسی زندگی کی شروعات اپنے آبائی ضلع گلبرگ (اب کلبرگی) میں ایک یونین لیڈر کی شکل میں کی تھی۔ پیشے سے وکیل رہے کھڑگے 1969 میں کانگریس میں شامل ہوئے اور گلبرگ شہری کانگریس کمیٹی کے سربراہ بنے۔ 2009 میں لوک سبھا انتخاب کے ذریعہ قومی سیاست میں آنے سے پہلے انھوں نے گرومتکل اسمبلی حلقہ سے نو بار فتح درج کی۔ وہ گلبرگ سے دو بار لوک سبھا رکن رہ چکے ہیں۔ 2014 کے لوک سبھا انتخاب میں مودی لہر کے باوجود انھوں نے گلبرگ سے تقریباً 74 ہزار ووٹوں کے فرق سے جیت حاصل کی تھی۔ 2019 سے وہ راجیہ سبھا میں ہیں۔