مالدیپ تنازعہ: وزیر اعظم مودی خارجہ پالیسی پر اپنی مرضی کے مطابق کام کر رہے ہیں، ملکارجن کھڑگے

کلبرگی (کرناٹک): راجیہ سبھا میں اپوزیشن لیڈر اور کانگریس کے سربراہ ملکارجن کھڑگے نے کہا کہ وزیر اعظم نریندر مودی خارجہ پالیسی کے معاملات میں اپنی خواہش کے مطابق کام کر رہے ہیں۔ کلبرگی میں نامہ نگاروں سے بات کرتے ہوئے جب کھڑگے سے مالدیپ میں جاری تنازعہ کے بارے میں پوچھا گیا تو انہوں نے کہا، ’’وزیر اعظم نریندر مودی ہر چیز کو ذاتی طور پر لے رہے ہیں۔‘‘

انہوں نے کہا کہ بین الاقوامی سطح پر ہمیں اپنے پڑوسی ممالک کے ساتھ بہتر تعلقات رکھنے کی ضرورت ہے۔ تاہم، مشکل اور برے حالات میں ہمیں کسی بھی جدوجہد کے لیے تیار رہنا ہوگا۔ کھڑگے نے کہا کہ ’’جدوجہد اسی طرح کی جانی چاہئے جس طرح آنجہانی وزیر اعظم اندرا گاندھی نے کی تھی اور بنگلہ دیش کو آزاد کرایا تھا۔

انہوں نے کہا کہ ’’پی ایم مودی خارجہ پالیسی کے معاملات اپنی مرضی کے مطابق چلا رہے ہیں۔‘‘ کھڑگے نے مزید کہا کہ پی ایم مودی کسی بھی وقت کسی کو گلے لگاتے ہیں اور لوگوں کو اپنی مرضی کے مطابق پٹخنی بھی دیتے ہیں!

کھڑگے نے کہا، ’’ہم اپنے ارد گرد کے لوگوں کو نہیں بدلتے۔ ہمیں ساتھ رہنا ہے اور آگے بڑھنا ہے۔ لیکن، جب وہ ہم پر حملہ کرتا ہے، تو ہمیں ملک کے مفاد میں اس کا سامنا کرنے اور احتجاج کرنے کے لیے تیار رہنا ہوگا۔‘‘