مہاراشٹر میں مہایوتی کا 'انتخابی مستقبل' تاریک، اسے اقتدار گنوانے سے پہلے موڈانی کی حفاظت کرنی ہوگی: جے رام رمیش

نئی دہلی: الیکشن کمیشن آج سہ پہر 3:30 بجے دو ریاستوں کے انتخابات کی تاریخوں کا اعلان کرنے جا رہا ہے، اس سے پہلے کانگریس کے جنرل سکریٹری جے رام رمیش نے ایکس (سابقہ ٹوئٹر) پر بی جے پی حکومت اور ان کی اتحادی جماعتوں پر سخت حملہ کیا ہے۔ ان کی پوسٹ میں خاص طور پر مہاراشٹر حکومت کی جانب سے مبینہ طور پر بڑے کاروباری گروپوں کو زمین اور دیگر وسائل کی فراہمی کو ہدف بنایا گیا ہے۔

جے رام رمیش نے اپنی پوسٹ میں واضح طور پر اڈانی گروپ کا حوالہ دیتے ہوئے کہا، ’’مہاراشٹر میں بی جے پی کی اتحادی حکومت اس بات سے اچھی طرح واقف ہے کہ وہ انتخابات میں واپس اقتدار میں نہیں آئے گی اور اسی وجہ سے وہ آخری دنوں میں عوامی مفادات کو نظرانداز کرتے ہوئے بڑے کاروباری گروپوں کو تحفے دینے میں مصروف ہے۔‘‘ انہوں نے مزید کہا کہ حکومت نے ریاست کے اہم وسائل کو اڈانی گروپ کے حوالے کر دیا ہے۔

جے رام رمیش نے اپنی پوسٹ میں چند اہم تاریخوں کا ذکر کیا جن میں مہاراشٹر حکومت نے اڈانی گروپ کو زمین اور دیگر وسائل فراہم کیے:

۔ 15 ستمبر 2024: اڈانی گروپ کو 6600 میگا واٹ بجلی کی فراہمی کے لیے توانائی کنٹریکٹ دیا گیا، اس سے صارفین کو زیادہ قیمت ادا کرنی پڑے گی۔

۔ 30 ستمبر 2024: حکومت نے اڈانی گروپ کو 255 ایکڑ ماحولیات کے لحاظ سے حساس سالٹ پین (نمک کا میدان) کی زمین سونپی۔

۔ 10 اکتوبر 2024: مدھ علاقے میں 140 ایکڑ زمین اڈانی گروپ کو دی گئی۔

۔ 14 اکتوبر 2024: ممبئی میں دیونار لینڈ فل سے 124 ایکڑ زمین اڈانی گروپ کو فراہم کی گئی۔

جے رام رمیش نے الزام لگایا کہ بی جے پی کی اتحادی حکومت کا انتخابی مستقبل تاریک نظر آتا ہے، لیکن حکومت اقتدار سے باہر جانے سے پہلے اڈانی گروپ کے مالی مفادات کا تحفظ کرنے کی کوشش کر رہی ہے۔

مہاراشٹر میں آنے والے اسمبلی انتخابات کے تناظر میں خاص طور پر حکومت کے کارپوریٹ سیکٹر سے تعلقات کو لے کر کانگریس اور دیگر اپوزیشن جماعتیں بی جے پی پر شدید تنقید کر رہی ہیں۔ کانگریس کی قیادت میں اپوزیشن نے الزام لگایا ہے کہ حکومت اپنے آخری دنوں میں بڑے کاروباری گروپوں کو غیر منصفانہ فائدہ پہنچا رہی ہے، جبکہ عوامی مفادات کو نظرانداز کیا جا رہا ہے۔

یہ پوسٹ ایسے وقت میں سامنے آئی ہے جب مہاراشٹر میں انتخابی سرگرمیاں تیز ہو رہی ہیں اور دونوں بڑی جماعتیں، بی جے پی اور کانگریس، اپنی حکمت عملی کو تیز کرنے میں مصروف ہیں۔