مہاراشٹر تنازعہ: اتحاد کے اجلاس میں ادھو ٹھاکرے کے نام پر مہر، یکم دسمبر کو حلف برداری

ادھوو ٹھاکرے کو شیو سینا، این سی پی اور کانگریس کے اتحاد (مہا وکاس اگھاڈی) کا قائد منتخب کر لیا گیا ہے۔ اتحاد کے قائد کی حیثیت سے تمام اراکین اسمبلی نے ادھو ٹھاکرے کے نام کی تائید کی۔ اس کے ساتھ ہی یہ بات واضح ہوگئی کہ ادھو ٹھاکرے مہاراشٹر کے نئے وزیر اعلی ہوں گے۔

ادھو ٹھاکرے کے قائد منتخب ہونے کے بعد این سی پی سربراہ شرد پوار نے کہا کہ تینوں پارٹیوں کے اتحاد کے تین نمائندے آج گورنر سے ملاقات کریں گے۔ پوار نے یہ بھی کہا کہ ادھو ٹھاکرے کے ماتحت مخلوط حکومت یکم دسمبر کو شیواجی پارک میں حلف اٹھائے گی۔

بی جے پی کے رکن اسمبلی کالیداس کولمبر کو مہاراشٹر اسمبلی کا پروٹیم (عبوری) اسپیکر مقرر کیا گیا ہے۔ راجبھون میں گورنر نے انہیں پروٹیم اسپیکر کی حیثیت سے حلف دلایا۔ کالیداس کولمبر نے حلف لینے کے بعد کہا کہ مہاراشٹر کے نو منتخب ارکان اسمبلی کل کو حل لیں گے۔

واضح رہے کہ کولمبکر مسلسل کئی مرتبہ اسمبلی انتحابات میں کامیاب ہوئے ہیں ،کانگریس کے ٹکٹ پر انہوں نے 2014 میں پانچواں الیکشن لڑاتھا ،لیکن اس بار نرائن رانے کے ساتھ بی جے پی میں شمولیت اختیار کی اور وڈالااسمبلی حلقہ سے منتخب ہوئے۔عارضی اسپیکر کی حیثیت سے کالی داس کولمبکر اراکین اسمبلی کو ایوان میں حلف دلائیں گے۔

گونر بھگت سنگھ کوشیاری نے کل صبح 8 بجے اسمبلی کا اجلاس طلب کیا ہے۔ کل مہاراشٹر میں اسمبلی کا خصوصی اجلاس ہوگا۔ اس دوران ارکان اسمبلی کو حلف بھی دلایا جائے گا۔

ممبئی میں گورنر بھگت سنگھ کوشیاری سے مل کر وزیر اعلیٰ دینویندر فڑنویس نے ریاست کے وزیر اعلیٰ عہدہ سے اپنا استعفیٰ سونپ دیا ہے۔ اس کے ساتھ ہی مہاراشٹر میں بی جے پی کی حکومت گر گئی ہے۔ لیکن اس کے بعد بھی مہاراشٹر میں سیاسی ہلچل میں کوئی کمی نہیں آئی ہے اور دیکھنے والی بات یہ ہے کہ لک کس طرح کا ماحول ہوگا۔

دیویندر فڑنویس نے مہاراشٹر کے وزیر اعلیٰ عہدہ سے استعفیٰ دینے کا اعلان تو کیا ہی، ساتھ ہی انھوں نے پریس کانفرنس میں بننے والی نئی حکومت کے لیے نیک خواہشات کا بھی اظہار کیا۔ اجیت پوار کے نائب وزیر اعلیٰ عہدہ سے استعفیٰ دیے جانے کے بارے میں انھوں نے کہا کہ صبح میں اجیت پوار مجھ سے ملے اور کہا کہ وہ ذاتی اسباب کی بنا پر اپنا استعفیٰ دے رہے ہیں۔

میڈیا سے بات چیت کرتے ہوئے مہاراشٹر کے وزیر اعلیٰ دیویندر فڑنویس نے واضح لفظوں میں کہہ دیا کہ ان کے پاس نمبر نہیں ہے اور اب وہ گورنر کے پاس اپنا استعفیٰ نامہ سونپنے کے لیے جا رہے ہیں۔ پریس کانفرنس میں فڑنویس نے کہا کہ ’’مہاراشٹر کی عوام نے بی جے پی-شیوسینا اتحاد کو حکومت بنانے کے لیے مینڈیٹ دیا تھا لیکن شیوسینا نے ہمارا ساتھ چھوڑ دیا اور کانگریس و این سی پی سے بات چیت کرنے لگی۔‘‘

دیویندر فڑنویس نے بی جے پی کو ملی 105 سیٹوں کا حوالہ بھی میڈیا کے سامنے پیش کیا اور کہا کہ سب سے زیادہ سیٹیں بی جے پی کو حاصل ہوئی تھیں اور عوام چاہتی تھی کہ بی جے پی حکومت بنے لیکن 70 فیصد سیٹ حاصل کرنے والی بی جے پی کا ساتھ شیوسینا نے چھوڑ دیا۔‘‘

اجیت پوار کے نائب وزیر اعلیٰ عہدہ سے استعفیٰ دینے کی خبر کے بعد شیوسینا لیڈر سنجے راؤت کا بڑا بیان منظر عام پر آیا ہے۔ انھوں نے کہا کہ ’’اب ہم مہا اکثریت ثابت کریں گے اور بی جے پی کو اپنی طاقت دکھا دیں گے۔‘‘ سنجے راؤت نے ساتھ ہی یہ بھی کہا کہ اجیت دادا نے صحیح قدم اٹھایا ہے اور جلد ریاست میں شیوسینا، کانگریس اور این سی پی کی حکومت دیکھنے کو ملے گی۔

این سی پی لیڈر اجیت پوار نے فلور ٹسٹ سے پہلے ہی نائب وزیر اعلیٰ عہدہ سے استعفیٰ دے دیا ہے۔ حالانکہ این سی پی لیڈر جینت پاٹل نے اس سلسلے میں فی الحال کوئی جانکاری نہ ہونے کی بات کہی ہے۔ سپریم کورٹ کے ذریعہ 27 نومبر کو فلور ٹسٹ کرائے جانے سے متعلق فیصلہ سنائے جانے کے بعد مہاراشٹر کی سیاست میں اجیت پوار کا استعفیٰ ایک بڑی ہلچل کی طرف اشارہ کر رہا ہے۔ چونکہ ساڑھے تین بجے وزیر اعلیٰ دیویندر فڑنویس میڈیا سے خطاب کرنے والے ہیں، اس لیے کہا جا سکتا ہے کہ ابھی مہاراشٹر کا ڈرامہ اور بھی رنگ دکھانے والا ہے۔

ممبئی میں سیاسی ہلچل کے درمیان کانگریس، این سی پی اور شیوسینا اراکین اسمبلی کی آج شام 5 بجے مشترکہ میٹنگ ہوگی۔ اس میٹنگ میں تینوں پارٹیوں پر مبنی تشکیل نئے اتحاد کے لیڈر کا انتخاب کیا جائے گا۔

سابق وزیر اعظم اور کانگریس لیڈر ڈاکٹر منموہن سنگھ سے جب یہ پوچھا گیا کہ کیا این سی پی، شیوسینا اور کانگریس مہاراشٹر میں حکومت تشکیل دینے میں کامیاب ہوں گے؟ اس پر انھوں نے کہا کہ ’’مجھے امید ہے کہ یہ پارٹیاں مل کر حکومت بنائیں گی۔‘‘ ساتھ ہی آج سپریم کورٹ کے ذریعہ صادر فیصلے پر انھوں نے کہا کہ ’’ہم سبھی سپریم کورٹ کی عزت کرتے ہیں، ہمیں عدالت کے فیصلے کا احترام کرنا چاہیے۔‘‘

شیوسینا لیڈر سنجے راؤت نے سپریم کورٹ کے ذریعہ 27 نومبر کی شام 5 بجے تک فلور ٹسٹ کرائے جانے کے حکم پر خوشی کا اظہار کیا ہے۔ انھوں نے میڈیا سے کہا کہ ’’سچ کی جیت ہوئی ہے۔ عدالت نے ہمیں اکثریت ثابت کرنے کے لیے 30 گھنٹے کا وقت دیا ہے، ہم 30 منٹ میں اکثریت ثابت کر دیں گے۔‘‘

سنجے راؤت نے سپریم کورٹ کا فیصلہ آنے کے بعد اپنے ٹوئٹر ہینڈل پر بھی رد عمل ظاہر کیا۔ انھوں نے اس سلسلے میں دو ٹوئٹ کیے۔ پہلے ٹوئٹ میں انھوں نے صرف ’ستیہ میو جیتے‘ (سچ کی جیت) لکھا جب کہ دوسرے ٹوئٹ میں لکھا کہ ’’سچ پریشان ہو سکتا ہے، شکست نہیں کھا سکتا۔ جے ہند‘‘۔

مہاراشٹر میں فلور ٹسٹ کرانے سے متعلق سپریم کورٹ کا فیصلہ آنے کے بعد کانگریس صدر سونیا گاندھی کا بڑا بیان سامنے آیا ہے۔ میڈیا ذرائع کے مطابق سونیا گاندھی کا کہنا ہے کہ 27 نومبر کو ہونے والے فلور ٹسٹ میں کانگریس-این سی پی-شیوسینا کی جیت ہوگی۔

سپریم کورٹ کے ذریعہ 27 نومبر کی شام 5 بجے تک فلور ٹسٹ کرائے جانے کا حکم سنائے جانے کے بعد این سی پی ترجمان نواب ملک نے اپنا پہلا رد عمل ظاہر کیا ہے۔ انھوں نے میڈیا سے کہا کہ ’’سپریم کورٹ نے آج جو فیصلہ سنایا ہے وہ ہندوستانی جمہوریت میں سنگ میل کی حیثیت رکھتا ہے۔ کل 5 بجے سے پہلے یہ صاف ہو جائے گا کہ بی جے پی کا کھیل ختم ہو گیا ہے۔‘‘ ساتھ ہی انھوں نے یہ بھی کہا کہ کچھ دنوں میں یہاں شیوسینا-این سی پی-کانگریس کی حکومت ہوگی۔‘‘

مہاراشٹر میں فڑنویس حکومت کو زبردست جھٹکا دیتے ہوئے سپریم کورٹ نے نہ صرف 27 نومبر کی شام 5 بجے تک فلور ٹسٹ کرانے کا حکم سنایا بلکہ یہ بھی کہا کہ کوئی سیکرٹ ووٹنگ نہیں ہوگی اور پورے عمل کی لائیو ریکارڈنگ بھی کرائی جائے گی۔ شیوسینا، کانگریس اور این سی پی لیڈران سپریم کورٹ کے اس فیصلے سے انتہائی خوش ہیں اور اسے جمہوریت کی فتح قرار دے رہے ہیں۔

واضح رہے کہ فلور ٹسٹ سے قبل سبھی اراکین اسمبلی کو حلف دلایا جائے گا۔ اس کے بعد ہی اکثریت ثابت کرنے کے لیے فلور ٹسٹ کرایا جائے گا۔ فلور ٹسٹ پروٹیم اسپیکر ہی کرائیں گے۔

سپریم کورٹ نے شیوسینا، این سی پی اور کانگریس کے حق میں بڑا فیصلہ سناتے ہوئے 27 نومبر کی شام فلور ٹسٹ کرانے کا حکم صادر کر دیا ہے۔ بی جے پی نے عدالت عظمیٰ سے گزارش کی تھی کہ اکثریت ثابت کرنے کے لیے کچھ زیادہ دن کا وقت دیا جائے جسے نامنظور کر دیا گیا ہے۔ ساتھ ہی سپریم کورٹ نے اپوزیشن کا یہ بھی مطالبہ قبول کر لیا ہے کہ فلور ٹسٹ براہ راست ہوگا اور کسی بھی طرح کا سیکرٹ بیلٹ نہیں ہوگا۔

مہاراشٹر پر سپریم کورٹ سے تھوڑی دیر میں فیصلہ آنے والا ہے۔ پورے ملک کی اس پر نگاہیں مرکوز ہیں۔ تینوں جج عدالت پہنچ چکے ہیں اور فیصلہ سنانے کے لیے بیٹھ چکے ہیں۔

مہاراشٹر قانون سازیہ کے سکریٹری راجندر بھاگوت نے این سی پی قانون ساز پارٹی لیڈر معاملہ پر ایک بیان میڈیا کو دیا ہے۔ انھوں نے کہا کہ ’’سکریٹریٹ کو ایک خط موصول ہوا ہے جس میں دعویٰ کیا گیا ہے کہ جینت پاٹل این سی پی قانون ساز پارٹی کے لیڈر ہیں۔ لیکن فیصلہ اسپیکر کو لینا ہے۔ فی الحال اس پر کوئی فیصلہ نہیں لیا گیا ہے۔‘‘

مہاراشٹر تنازعہ پر سپریم کورٹ آج 10.30 بجے فیصلہ سنانے والا ہے اور اس سے قبل شیوسینا لیڈر سنجے راؤت نے ایک ٹوئٹ کیا ہے جس میں انھوں نے لکھا ہے کہ ’’162 اور مزید... انتظار کیجیے اور دیکھیے!‘‘ واضح رہے کہ شیوسینا-این سی پی-کانگریس نے پیر کی شام ممبئی کے ہوٹل حیات میں اپنے 162 اراکین اسمبلی کی میڈیا کے سامنے پریڈ کرائی تھی۔ سنجے راؤت کا ٹوئٹ اسی کے پیش نظر ہے اور انھوں نے واضح کیا ہے کہ شیوسینا-این سی پی-کانگریس کو حمایت دینے والے اراکین اسمبلی کی تعداد 162 سے بھی زیادہ ہوگی۔

مہاراشٹر میں دیویندر فڑنویس نے وزیر اعلیٰ کا حلف تو لے لیا لیکن شیوسینا، این سی پی اور کانگریس ان کے خلاف سپریم کورٹ پہنچ گئی۔ پیر کو معاملہ پر سماعت کے بعد فیصلہ محفوظ رکھ لیا گیا تھا۔ سپریم کورٹ آج صبح 10.30 بجے اس سلسلے میں فیصلہ سنانے والا ہے۔