مہاراشٹر-جھارکھنڈ کے اسمبلی انتخابات کی تاریخوں کا آج اعلان، الیکشن کمیشن سہ پہر 3:30 بجے کرے گا پریس کانفرنس

نئی دہلی: الیکشن کمیشن آج مہاراشٹر اور جھارکھنڈ کے انتخابات کی تاریخوں کا اعلان کرنے والا ہے۔ یہ اعلان دہلی کے وگیان بھون میں دوپہر 3:30 بجے ہونے والی ایک اہم پریس کانفرنس کے دوران کیا جائے گا۔

مہاراشٹر میں 288 اور جھارکھنڈ میں 81 اسمبلی سیٹوں کے لیے انتخابات ہوں گے، جن کے بعد حکومت سازی کی صورتحال واضح ہوگی۔ ان انتخابات کا سیاسی اثر دونوں ریاستوں کے ساتھ ساتھ قومی سیاست پر بھی نمایاں ہو سکتا ہے۔

مہاراشٹر میں موجودہ وقت میں شیو سینا کی قیادت والی ایکناتھ شندے حکومت ہے، جس نے 2022 میں بغاوت کرتے ہوئے بھارتیہ جنتا پارٹی (بی جے پی) سے ہاتھ ملا کر حکومت بنائی تھی۔ اس اتحاد میں این سی پی کا اجیت پوار گروپ بھی شامل ہو چکا ہے۔ 2019 کے انتخابات میں بی جے پی نے این ڈی اے کے ساتھ مل کر اکثریت حاصل کی تھی، لیکن شیو سینا نے بعد میں این سی پی اور کانگریس کے ساتھ ہاتھ ملا کر مہا وکاس اگھاڑی (ایم وی اے) حکومت بنائی، جس کے وزیر اعلیٰ ادھو ٹھاکرے بنے تھے۔

جھارکھنڈ میں 81 اسمبلی سیٹوں پر انتخابات ہونے ہیں، جہاں کا انتخابی دور 5 جنوری 2025 کو ختم ہو رہا ہے۔ پچھلے انتخابات 2019 میں منعقد ہوئے تھے۔ جھارکھنڈ میں بھی سیاسی استحکام کی صورتحال نہایت اہمیت کی حامل ہے، جہاں حکومتی اتحاد کو کئی چیلنجز کا سامنا ہے۔

دریں اثنا، جھارکھنڈ کے وزیر اعلی ہیمنت سورین کی پارٹی جھارکھنڈ مکتی مورچہ (جے ایم ایم) نے الیکشن کمیشن کو نشانہ بنایا ہے۔ جے ایم ایم لیڈر منوج پانڈے نے الزام لگایا ہے کہ بی جے پی لیڈروں کو کل ہی انتخابات کے اعلان کی اطلاع ملی تھی۔ پانڈے نے الیکشن کمیشن کو کٹھ پتلی بھی کہا ہے۔

منوج پانڈے نے کہا، ’’ہم انتخابات کے لیے ہمیشہ تیار ہیں۔ لیکن آج انتخابات کا اعلان ہونے والا ہے اور بی جے پی لیڈروں کو اس کا علم کل ہی ہو گیا، یہ بہت سنجیدہ موضوع ہے۔ کیا الیکشن کمیشن بی جے پی لیڈروں کی ہدایت پر کام کرتا ہے؟ ہمانتا بسوا سرما نے کل ایک بیان میں کہا کہ آج انتخابات کا اعلان ہونے جا رہا ہے۔ کسی بھی کمیشن کو اس طرح کٹھ پتلی بنائے رکھنا سنگین معاملہ ہے۔‘‘