مہاراشڑ اسمبلی انتخاب: این سی پی-ایس پی نے امیدواروں کی دوسری اور شیوسینا یو بی ٹی نے تیسری فہرست جاری کی

مہاراشٹر اسمبلی انتخاب کے پیش نظر این سی پی-ایس پی نے امیدواروں کی دوسری فہرست جاری کر دی ہے۔ اس فہرست میں 22 امیدواروں کے نام شامل ہیں۔ کل پہلی فہرست جاری کرتے ہوئے شرد پوار نے 45 امیدواروں کے نام کا اعلان کیا تھا۔ دوسری فہرست میں جن اہم امیدواروں کو ٹکٹ دیا گیا ہے ان میں اکولیا سے امت بھانگڑے، ایرندول سے ستیش پاٹل، گنگا پور سے ستیش چوہان، پاروتی سے اشون کدم، بیڈ سے سندیپ چھیرساگر اور مالشیر سے اتم جانکر شامل ہیں۔

امیدواروں کی دوسری فہرست کا اعلان این سی پی-ایس پی مہارشٹر کے ریاستی صدر جینت پاٹل نے ہفتہ کو پریس کانفرنس میں کیا۔ اس موقع پر انہوں نے’مہایوتی‘ حکومت پر حملہ کرتے ہوئے کہا کہ ’’صرف انتخاب کے پیش نظر پیاری بہنوں کو خوش کرنے کا کام چل رہا ہے۔‘‘ ساتھی ہی انہوں نے یہ بھی کہا کہ جئے شری کے متعلق دیا گیا بیان انتہائی افسوسناک تھا۔ ریاست کی عوام نے دیکھا کہ پیاری بہنوں کے ساتھ کیسا سلوک کیا گیا۔ جینت پاٹل نے کسانوں کے ساتھ ہو رہی ناانصافی کا ذکر کرتے ہوئے کہا کہ سویابین کی کاشت کرنے والے کسانوں کو بہت زیادہ نقصان ہوا ہے، اس کے باوجود ’مہایوتی‘ حکومت نے کسانوں کی مدد نہیں کی۔

اس درمیان مہاوکاس اگھاڑی (ایم وی اے) کی ایک اور حلیف پارٹی شیوسینا یو بی ٹی نے امیدواروں کی تیسری فہرست جاری کر دی ہے۔ اس فہرست میں 3 امیدواروں کا نام شامل ہے۔ تیسری فہرست کے مطابق شیوسینا یو بی ٹی نے ورسووا سے ہارون خان، گھاٹ کوپر مغرب سے سنجے بھالے راؤ اور ولے پارلے سے سندیپ نائک کو ٹکٹ دیا ہے۔ ان تینوں اسمبلی سیٹوں پر پہلے سے بی جے پی کا قبضہ ہے۔ اس بار بھی ان تینوں سیٹوں پر بی جے پی اپنا امیدوار کھڑا کر رہی ہے، یعنی مقابلہ براہ راست بی جے پی اور شیوسینا یو بی ٹی کے درمیان ہوگا۔

شیو سینا یو بی ٹی نے اب تک مجموعی طور پر 83 امیدواروں کا اعلان کر دیا ہے۔ کل جاری کی گئی پہلی فہرست میں 65 امیدواروں کے نام شامل تھے۔ آج صبح دوسری فہرست جاری ہوئی تھی جس میں 15 امیدواروں کے نام تھے، اور اب تیسری فہرست میں 3 امیدواروں کے نام ہیں۔

قابل ذکر ہے کہ اب تک مہاوکاس اگھاڑی میں شامل پارٹیوں نے 221 سیٹوں کے لیے امیدواروں کا اعلان کر دیا ہے۔ کانگریس نے 71 اور این سی پی-ایس پی نے 67 سیٹوں پر اپنے امیدوار کا نام واضح کر دیا ہے۔ دوسری طرف مہایوتی میں بی جے پی نے 99، شیو سینا (شندے گروپ) نے 45 اور این سی پی (اجیت پوار گروپ) نے 45 امیدواروں کے نام کا اعلان کیا ہے۔ اس طرح مہایوتی نے مجموعی طور پر 189 امیدواروں کا اعلان کر دیا ہے۔