مدھیہ پردیش میں پیش آیا ’بدایوں‘ جیسا واقعہ، بیوہ عورت کی اجتماعی عصمت دری اور پھر...

بی جے پی حکمراں ریاست اتر پردیش میں اجتماعی عصمت دری اور قتل کے واقعات تو لگاتار سامنے آتے ہی رہتے ہیں، اب مدھیہ پردیش میں بھی حالات کافی خراب ہوتے ہوئے نظر آ رہے ہیں۔ گزشتہ دنوں اتر پردیش کے بدایوں میں 50 سالہ خاتون کی اجتماعی عصمت دری کی گئی تھی اور پھر اسے انتہائی ظالمانہ طریقے سے موت کے گھاٹ اتار دیا گیا تھا۔ اب کچھ ایسا ہی معاملہ مدھیہ پردیش کے سیدھی-سیدھی میں پیش آیا ہے۔ یہاں پر ایک بیوہ خاتون کے ساتھ تین لوگوں نے اجتماعی عصمت دری کی اور پھر اس کے پرائیویٹ پارٹ میں 4 فٹ لمبی لوہے کی سریا ڈال دی۔ متاثرہ کی حالت انتہائی نازک بتائی جا رہی ہے اور اس کا اسپتال میں علاج چل رہا ہے۔

این ڈی ٹی وی پر نشر ایک خبر کے مطابق واقعہ املیہ تھانہ حلقہ کا ہے جہاں تینوں ملزمین کرانے کی چھوٹی سی دکان چلا رہی خاتون کی دکان پر پانی اور گٹکا خریدنے کے بہانے گئے اور پھر خاتون کے ساتھ اجتماعی عصمت دری کرنے کے بعد اس کے ساتھ ظلم کی انتہا پار کرتے ہوئے پرائیویٹ پارٹ کو سریا سے بری طرح زخمی کر دیا۔ خاتون کی حالت انتہائی سنگین ہونے کے سبب سیدھی ضلع اسپتال میں اسے ابتدائی علاج کے بعد ریوا سنجے گاندھی اسپتال ریوا ریفر کیا گیا ہے جہاں انتظامیہ کی نگرانی میں علاج چل رہا ہے۔ امیلیا پولس نے تینوں ملزمین کے خلاف معاملہ درج کر لیا ہے۔

حال کے دنوں میں خواتین کے ساتھ ایسے حادثات کچھ زیادہ ہی پیش آ رہے ہیں جس سے لوگوں میں ایک خوف کا عالم ہے۔ سیدھی میں ہوئے اس واقعہ کے بعد نربھیا واقعہ کی یاد ایک بار پھر تازہ ہو گئی ہے۔ اس سے قبل اتر پردیش کے بدایوں میں بھی نربھیا اجتماعی عصمت دری جیسی حیوانیت سامنے آئی تھی۔