مدھیہ پردیش انتخاب: ووٹنگ کے بعد ووٹ شماری کی تیاری، کانگریس نے امیدواروں کو دی ٹریننگ

مدھیہ پردیش میں اسمبلی انتخاب ہو چکا ہے اور اب ووٹ شماری کا انتظار ہے جو 3 دسمبر کو ہونی ہے۔ ایسے میں ووٹ شماری کے لیے کمر کستے ہوئے کانگریس کے تجربہ کار لیڈروں نے پارٹی امیدواروں اور کارکنان کا ٹریننگ کیمپ منعقد کر انھیں کاؤنٹنگ کی باریکیوں سے مطلع کرایا۔ ٹریننگ کرنے والے لیڈران نے 230 امیدواروں اور ان کے ووٹ شماری کارکنان کے ساتھ ہر راؤنڈ پوری سرگرمی، سرکاری ملازمین کے ذریعہ انتخابی ڈیوٹی کے دوران پوسٹل ووٹوں کی شماری اور ووٹ شماری کے دوران آنے والی پریشانیوں پر فعالیت، آئینی مسائل سمیت دیگر ایشوز پر تبادلہ خیال کیا۔

یہ میٹنگ دو اجلاس میں منعقد ہوئی۔ پہلے اجلاس میں ریوا، شہڈول، جبل پور، گوالیر-چنبل ڈویژن اور دوسرے اجلاس میں اندور، اجین، نرمداپورم، بھوپال اور ساگر ڈویژن کے امیدواروں کی میٹنگ منعقد ہوئی۔ ٹریننگ کے دوران ریاستی کانگریس صدر اور سابق وزیر اعلیٰ کمل ناتھ نے میٹنگ میں موجود کانگریس امیدواروں اور کارکنان سے براہ راست بات کرتے ہوئے کہا کہ ووٹ شماری کا عمل بغیر کسی خوف اور دباؤ کے ساتھ کریں۔

کمل ناتھ نے کہا کہ کانگریس کے ایک ایک کارن نے پوری وفاداری اور ایمانداری سے کام کیا ہے۔ کانگریس کی حکومت بننے پر ریاست کی نئی تصویر بنے گی۔ نوجوانوں میں نئی توانائی پھیلے گی، خواتین کو احترام ملے گا، کسانوں کی ترقی ہوگی اور نئی نسل کا مستقبل روشن ہوگا۔ انھوں نے کہا کہ ووٹ شماری کے دن پوری بے خوفی کے ساتھ کام کریں، کوئی بھی مسئلہ آنے پر کانگریس امیدوار اور الیکٹورل افسران کو کو مطلع کریں تاکہ قانونی طریقے سے اس کا حل نکل سکے۔

ریاستی کانگریس کے نائب صدر اور انتخابی کمیشن ورک انچارج جے پی دھنوپیا نے ووٹ شماری کے دن کی سرگرمیوں اور انتخابی کمیشن کے ذریعہ حاصل گائیڈلائنس پر عمل کرتے ہوئے ووٹ شماری کرائے جانے کے متعلق جانکاری دیتے ہوئے کہا کہ ووٹنگ کے دن جو ای وی ایم مشین سیل کر کے اسرانگ روم میں رکھی گئی، اس کا پوری طرح جائزہ لیں، کسی طرح کی کوئی خامی پائے جانے پر الیکٹورل افسر سے فوراً رابطہ کر کسی بھی طرح کے غیر انسانی واقعہ ہونے کی جانکاری دیں۔

دھنوپیا نے کہا کہ ووٹ شماری کے دوران ووٹ شماری کی جگہ لے جائے جانے والے سامان ضرور لے جائیں اور ووٹ شماری شروع ہوتے ہی ووٹنگ کے ہر راؤنڈ اور ایک ایک ووٹ پر اپنی گہری نظر رکھیں۔ سرکاری ملازمین کے ذریعہ کیے گئے پوسٹل ووٹ کی گنتی مکمل احتیاط سے کرائیں، کسی بھی نااہل شخص کا داخلہ اس دوران وہاں نہیں ہونے دیا جائے۔

دھنوپیا نے کہا کہ موبائل اور دیگر انٹرنیٹ سے متعلق اشیا ووٹ شماری والی جگہ پر لے جانا پوری طرح سے منع ہے۔ اگر کوئی شخص اس اصول پر عمل نہیں کرتا یا دیگر پارٹی کے لوگوں کے ذریعہ کسی طرح کی غیر انسانی، غیر سماجی واقعہ کو انجام دیا جاتا ہے تو پورے احتیاط کے ساتھ اس کی مخالفت کریں، جلد ہی اپنے امیدوار اور الیکٹورل افسر کو مطلع کرائیں۔