مدھیہ پردیش انتخاب: مرکزی وزیر پھگن کلستے کو کانگریس امیدوار نے دی شکست

مدھیہ پردیش میں ووٹوں کی گنتی جاری ہے اور بی جے پی رجحانوں میں ایک بڑی جیت کی طرف بڑھتی ہوئی دکھائی دے رہی ہے۔ تازہ رجحانوں میں جہاں بی جے پی 150 سے زائد سیٹوں پر سبقت بنائے ہوئے ہے، وہیں کانگریس تقریباً 70 سیٹوں پر آگے ہے۔ حالانکہ کچھ سیٹوں پر بی جے پی اور کانگریس امیدواروں کے درمیان بہت کم ووٹوں کا فاصلہ ہے۔ اس درمیان بی جے پی کے لیے ایک بُری خبر سامنے آئی ہے۔ مرکزی وزیر پھگن سنگھ کلستے کو شکست کا سامنا کرنا پڑا ہے۔

پھگن سنگھ کلستے نے مدھیہ پردیش کی نواس اسمبلی سیٹ سے قسمت آزمائی کی تھی جہاں کانگریس امیدوار نے انھیں شکست فاش دے دی ہے۔ کانگریس امیدوار چین سنگھ برکڑے نے 9723 ووٹوں کے فرق سے انھیں ہرایا۔ پھگن سنگھ ان لیڈروں میں شامل ہیں جنھیں بی جے پی نے مرکز سے سیدھے مدھیہ پردیش بھیجا تھا۔ شروعاتی رجحانوں میں ہی وہ 8 ہزار ووٹوں سے پیچھے چل رہے تھے اور پھر اس فرق کو وہ کم نہیں کر سکے۔ قابل ذکر بات یہ بھی ہے کہ بی جے پی کے معروف لیڈر نروتم مشرا بھی دَتیا اسمبلی سیٹ سے پیچھے چل رہے ہیں۔ انھیں کانگریس امیدوار بھارتی راجندر سے زبردست ٹکر مل رہی ہے۔

واضح رہے کہ پھگّن سنگھ کلستے فی الحال مرکز میں وزیر مملکت برائے دیہی ترقی و اسپتال ہیں۔ پھگن سنگھ کا نام اس لیے بھی سرخیوں میں رہا کیونکہ شیوراج سنگھ چوہان کی جگہ انھیں وزیر اعلیٰ بنائے جانے کا امکان بھی ظاہر کیا جاتا رہا ہے۔ حالانکہ اب ایسے قیاس ختم ہی ہو گئے معلوم پڑ رہے ہیں۔ 2019 میں پھگن سنگھ کلستے منڈلا پارلیمانی حلقہ سے جیت کر پارلیمنٹ پہنچے تھے۔ وہ اس سے قبل 1996 سے 2009 تک منڈلا لوک سبھا حلقہ سے ہی رکن پارلیمنٹ رہے تھے۔