مدھیہ پردیش: بیتول کلکٹر کے ایکس ہینڈل سے حکومت مخالف پوسٹ! ہینڈلر کی ملازمت ختم

بیتول: مدھیہ پردیش کے بیتول ضلع کلکٹر کے ایکس ہینڈل سے ایک ایسی پوسٹ ری پوسٹ کر دی گئی جس میں حکومت کو بدعنوان بتایا گیا ہے۔ اس معاملہ میں پولیس میں ایف آئی آر درج کرائی گئی ہے اور کلکٹر کے ایکس ہینڈل کو سنبھالے والے ملازم (ہینڈلر) کی خدمات ختم کر دی گئی ہیں۔

خیال رہے کہ کلکٹر بیتول امن بیر بینس کے سرکاری ایکس ہینڈل سے 17 ستمبر کی رات تقریباً 11.30 بجے ایک ایسی پوسٹ کو ری پوسٹ (دوبارہ پوسٹ) کیا گیا جس میں حکومت پر بدعنوانی کے الزامات عائد کیے گئے ہیں۔

یہ پوسٹ سمیکشا سنگھ کی ہے جس میں لکھا ہے، عوام اب کرپٹ حکومت کو بے دخل کرے گی۔ اس کے ساتھ 86 ہزار کروڑ روپے کے گھوٹالہ کا بھی ذکر ہے۔ اس پوسٹ کے بعد انتظامیہ حرکت میں آ گئی۔

گنج پولس اسٹیشن کے انچارج دیوکرن نے بتایا کہ اس سے کی گئی شکایتی درخواست میں ایڈیشنل کلکٹر جے پرکاش نے بتایا ہے کہ بیتول کلکٹر کے ایکس ہینڈل پر 17 ستمبر کو ایک پوسٹ دیکھی گئی۔ یہ پوسٹ کلکٹر کے اکاؤنٹ سے سمیکشا سنگھ نامی ہینڈل سے بنائی گئی پوسٹ کو ری پوسٹ کیا گیا ہے۔ اس پوسٹ میں ایک پوسٹر بھی لگایا گیا ہے جس میں 86 ہزار کروڑ کا گھوٹالہ لکھا گیا ہے۔

گنج پولس اسٹیشن کے انچارج دیوکرن نے بتایا کہ ایڈیشنل کلکٹر جے پرکاش کی شکایت پر گنج تھانے میں انفارمیشن ٹکنالوجی ایکٹ 2000 کی دفعہ 66 کے تحت نامعلوم ملزم کے خلاف ایک جرم درج کیا گیا ہے۔ اس معاملے کی سائبر سیل سے تحقیقات کی جائیں گی۔

اس معاملے میں کلکٹر امن بیر سنگھ بینس نے بتایا کہ انہیں اس پوسٹ کے بارے میں اس وقت معلومات ملی جب ایک اکاؤنٹ ہولڈر نے انہیں اس کے بارے میں بتایا۔ کلکٹر بینس نے کہا کہ محکمہ تعلقات عامہ نے ہینڈل چلانے والے ملازم شیورام بارنگے کی خدمات ختم کر دی ہیں۔