مدھیہ پردیش: بس پل میں گرنے سے دلخراش حادثہ، 15 مسافروں کی موت، 20 سے زائد زخمی

بھوپال: مدھیہ پردیش کے کھرگون ضلع میں دلخراش حادثہ پیش آیا ہے۔ یہاں سری کھنڈی سے اندور جا رہی بس دسواں اور ڈونگرگاؤں کے درمیان بوراڈ ندی کے پل کی ریلنگ توڑ کر نیچے گر گئی۔ اس حادثے میں کم از کم 15 لوگوں کی موت ہو گئی ہے، جبکہ 20 سے زائد افراد زخمی ہوئے ہیں۔

ضلعی انتظامیہ کے مطابق حادثے میں ہلاک ہونے والے 15 افراد میں چھ مرد، چھ خواتین اور تین بچے شامل ہیں۔ زخمیوں کی تعداد 24 سے زائد ہے۔ سبھی کو علاج کے لیے اسپتال بھیجا گیا ہے۔ جائے وقوعہ پر مسافروں کی چیخ و پکار سنائی دی اور موقع پر لوگوں کی بڑی بھیڑ جمع ہو گئی۔ حادثہ کے مقام پر موجود لوگ خود ہی لوگوں کو بس سے باہر نکالنے کی کوشش کر رہے تھے۔ واقعہ کی اطلاع ملتے ہی ایس پی، کلکٹر اور رکن اسمبلی موقع پر پہنچ گئے اور زخمیوں کو اسپتال پہنچایا گیا۔

مدھیہ پردیش کے وزیر اعلیٰ شیوراج سنگھ چوہان نے حادثے میں جان گنوانے والوں کے تئیں تعزیت اور غم کا اظہار کیا ہے۔ مدھیہ پردیش حکومت نے اعلان کیا ہے کہ کھرگون بس حادثے میں جاں بحق ہونے والوں کے لواحقین کو 4 لاکھ روپے، شدید زخمیوں کو 50 ہزار روپے، معمولی زخمیوں کو 25 ہزار روپے دیئے جائیں گے اور مناسب علاج کے انتظامات کیے جائیں گے۔