وجئے مالیا برطانیہ میں بھی دیوالیہ قرار، بینکوں کے قرضوں کی وصولی کے لئے راستہ صاف

برطانیہ کی ایک عدالت نے مفرور ہندوستانی تاجر وجے مالیہ کو پیر کے روز دیوالیہ اعلان کر دیا ، جس سے مالیا کے اثاثے ضبط کرکے ہندوستانی بینکوں کے لئے قرضوں کی وصولی کی راہ ہموار ہوگئی۔

لندن میں چیف انسالوینسیز اینڈ کمپنیز کورٹ کے جج مائیکل بریگز نے مالیہ کو دیوالیہ قرار دینے کا اعلان کیا ہے۔ مالیہ کے خلاف اسٹیٹ بینک آف انڈیا کی سربراہی میں 13 ہندوستانی بینکوں کے کنسورشیم نے لندن کی عدالت میں درخواست دائر کی تھی۔ درخواست میں مالیہ کو کنگ فشر ایئر لائنز کو دیئے گئے قرضوں کی وصولی کے لئے دیوالیہ قرار دینے کی مانگ کی گئی تھی۔

ہندوستانی بینکوں کی نمائندگی کرنے والی لاء کمپنی ٹی ایل ٹی، ایل ایل پی اور بیرسٹر مارسیا شیکرڈیمیان نے ان کی جانب سے ایک عرضی داخل کی اور مالیہ کو دیوالیہ قرار دینے کی اپیل کی۔

واضح رہے کہ مالیہ کو قرض دینے والے بینکوں نے رواں ماہ کنگ فشر ایئر لائنز کے حصص فروخت کرکے 792.12 کروڑ روپئے اکٹھے کیے ہیں۔ انفورسمنٹ ڈائریکٹوریٹ نے منی لانڈرنگ سے متعلق ایک معاملے میں ان حصص کو ضبط کرلیا تھا۔ ای ڈی نے یہ حصص اسٹیٹ بینک کے زیرقیادت قرض دہندہ بینکوں کے حوالے کردیئے تھے۔ گزشتہ ماہ بھی اسی معاملے میں ، بینکوں کے کنسورشیم کو حصص کی فروخت کے ذریعہ 7181 کروڑ روپے ملے تھے۔

برطانیہ فرار ہونے والے مالیہ کے خلاف ای ڈی اور سی بی آئی 9000 کروڑ روپئے کے مبینہ بینک فراڈ کی تحقیقات کر رہی ہے۔ اس دھوکہ دہی کا تعلق مالیہ کی بند ہوچکی کنگ فشر ایئر لائن سے ہے ، جس کے لئے اس نے متعدد بینکوں سے تقریباً9000 کروڑ روپے کے قرضے لئے تھے۔ اس قرض کی وصولی کے لئے قرض وصولی ٹریبونل (ڈی آر ٹی) نے مالیہ کی کمپنی کے حصص فروخت کردیئے ہیں۔