عام انتخابات کے چار مرحلوں کے بعد وزیر اعظم کا چہرہ اتر چکا ہے: راہل گاندھی

جتارہ (ٹیکم گڑھ): کانگریس صدر راہل گاندھی نے وزیر اعظم نریندر مودی پر مسلسل حملے کرتے ہوئے کہا کہ عام انتخابات کے چار مرحلوں کے بعد ان کا چہرہ اتر گیا ہے اور انٹرویوز میں بھی وہ ہچکچاہٹ کے ساتھ بول رہے ہیں۔

راہل گاندھی نے مدھیہ پردیش کے ٹیکم گڑھ پارلیمانی حلقہ سے کانگریس امیدوار کرن اہروار کے حق میں منعقد ہ انتخابی ریلی سے خطاب کرتے ہوئے یہ بات کہی۔ انہوں نے کہا کہ وہ مودی سے نہیں ڈرتے۔ انہوں نے ریلی میں موجود لوگوں سے کہا کہ وہ وزیر اعظم کا چہرہ دیکھیں۔ ان کا چہرہ سکڑ گیا ہے اور وہ انٹرویو میں بھی ہچکچاکر بول رہے ہیں۔

انہوں نے الزام لگایا کہ مودی نے رافیل طیارہ سودے میں ایئر فورس سے چوری کی اور 30 ہزار کروڑ روپے امبانی کی جیب میں ڈال دیئے۔ اس دوران گاندھی کے کے جلسے میں بھی کئی بار ’چوکیدار چور ہے‘ کے نعرے لگے۔ انہوں نے کہا کہ وہ ’چوکیدار‘ لفظ بولتے ہیں اور عوام اپنے آپ آگے کی بات بول دیتے ہیں۔

ادھر، مدھیہ پردیش کے پنّا میں انتخابی جلسہ سے خطاب کرتے ہوئے بھی راہل گاندھی نے پی ایم مودی کو زبردست تنقید کا نشانہ بنایا۔ انہوں نے کہا کہ جو ملک کا ہزاروں کروڑ روپے لے کر بھاگ گئے انھیں پی ایم مودی بھائی بلاتے ہیں۔ کانگریس صدر نے کہا کہ مودی جی میہل چوکسی اور نیرو مودی کو بھائی کہہ کر بلاتے ہیں۔

کانگریس صدر نے کہا کہ میرا ماننا ہے کہ عوام ’مالک‘ ہوتی ہے۔ میں مودی جی کی طرح ’من کی بات‘ نہیں کروں گا، آپ کے من کی بات سننے کے لیے یہاں آیا ہوں۔ راہل گاندھی نے مزید کہا کہ میں آپ کی بات سن کر کام کرتا ہوں۔ انھوں نے کہا کہ ’نیائے‘ منصوبہ عوام کی آواز ہے۔ کسانوں اور عام لوگوں سے پوچھ کر ہم نے ’نیائے‘ منصوبہ کو تیار کیا ہے۔