دہلی حکومت نے شراب پینے کی عمر 25 سے گھٹا کر 21 سال کی

کیجریوال حکومت نے ایک بڑا فیصلہ لیتے ہوئے ان شراب پینے والے ان نوجوانوں کو خوش خبری دی ہے جن کو کم عمر کی وجہ سے شراب پینے کی اجازت نہیں تھی۔ دہلی کابینہ نے آبکاری پالیسی میں پیر کو تبدیلی کرتے ہوئے شراب پینے کے لئے نوجوانوں کی عمر 25 سے گھٹا کر 21 سال کردی ہے۔

نائب وزیراعلی منیش سسودیا نے اس ضمن میں اعلان کرتے ہوئے کہا کہ قومی دارالحکومت خطے میں شراب کی کوئی نئی دکان نہیں کھولی جائے گی۔ نئی دکان نہیں کھولی جائے گی لیکن نئے صارف ضرور تیار کر لئے گئے ہیں ۔ ویسے آ ج کل بہت کم عمر کے نوجوانوں میں شراب پینے کا چلن ہے لیکن پابندی کی وجہ سے ایک خوف تھا جو نئے فیصلے کے بعد ختم ہو جائے گا۔

ایک طرف جہاں کئی ریاستوں میں شراب پر پابندی عائد ہے وہیں دہلی میں کیجریوال حکومت نے اس کو مزید عام کرنے کے لئے نوجوان شراب پینے والوں کے لئے عمر کی حد گھٹا دی ہے۔ اس سے دہلی حکومت کے سرکاری خزانہ کو ضروری تھوڑا فائدہ ہو گا کیونکہ کچھ نوجوانوں میں خوف ختم ہو جائے گا ۔

واضح رہے کہ موجودہ وقت میں دہلی میں واقع دکانوں میں سے 60 فیصد سے زیادہ سرکاری طورپر چلائی جارہی ہیں۔

مسٹر سسودیا نے کہا،’’حکومت شراب کی دکانوں کی یکساں تقسیم کو یقینی بنائے گی تاکہ شراب مافیاؤں کو کاروبار سے باہر نکالا جا سکے۔ محکمہ آبکاری میں اصلاحات کے بعد 20 فیصد کے محصول کے اضافے کا اندازہ ہے۔