ایل جی نے مجھے سپریم کورٹ میں سچ بولنے سے روکا! دہلی میئر انتخاب میں کیجریوال کا بڑا الزام

نئی دہلی: دہلی کے وزیر اعلیٰ اور عام آدمی پارٹی کے قومی کنوینر اروند کیجریوال نے ایل جی وی کے سکسینہ پر دہلی کے میئر انتخاب کے سلسلے میں سپریم کورٹ میں سچ بولنے سے روکنے کا الزام لگایا ہے۔ کیجریوال نے کہا کہ سپریم کورٹ میں جمہوریت اور دہلی کے عوام کی جیت ہوئی ہے۔

اروند کیجریوال نے کہا کہ جمعہ کو سپریم کورٹ میں جمہوریت کی جیت ہوئی۔ اب ہم نے ایل جی کو 22 فروری کو میئر کا انتخاب کرانے کی تجویز پیش کی ہے۔ انتخاب جلد ہوگا اور دہلی کے لوگوں کو میئر ملے گا۔ پریس کانفرنس میں کیجریوال نے کہا کہ ایل جی نے کل سپریم کورٹ میں ہونے والے معاملہ کو متاثر کرنے کی کوشش کی!

دہلی کے وزیر اعلیٰ نے کہا کہ عام آدمی پارٹی کی امیدوار شیلی اوبرائے نے میئر کے انتخاب کے لیے سپریم کورٹ میں عرضی دائر کی۔ اس میں انہوں نے دہلی حکومت اور ایل جی کو علیحدہ فریق بنایا کیونکہ اس معاملے میں ایل جی اور دہلی حکومت کی رائے مختلف تھی۔ اس معاملے میں حکومت کی جانب سے گوتم نارائن کو عدالت میں دہلی حکومت کی طرف سے پیش کرنے کے لیے وکیل مقرر کیا گیا تھا۔ اس سلسلے میں حکومت نے سکریٹری کو حکم نامہ جاری کر دیا ہے۔

اس کے بعد ایل جی نے 9 فروری کی رات سکریٹری کو حکم دیا کہ ان کے وکیل یعنی تشار مہتا کو دہلی حکومت کا وکیل بنایا جائے۔ آرڈر پڑھتے ہوئے کیجریوال نے بتایا کہ ایل جی کے حکم میں کہا گیا ہے کہ ہمارے ذریعہ کئے گئے کام کا سپریم کورٹ میں دفاع کرنا ہوگا۔ وزیر اعلیٰ نے کہا کہ دہلی حکومت کے وکیل سپریم کورٹ میں کیا کہیں گے، یہ بھی ایل جی طے کریں گے!

کیجریوال نے کہا کہ دہلی حکومت کے سکریٹری نے ہمارا وکالت نامہ تشار مہتا کو سونپا۔ تشار مہتا دہلی حکومت اور ایل جی دونوں کی طرف سے سپریم کورٹ میں کھڑے ہوئے۔ کیجریوال نے پوچھا کہ ایل جی نے ایسا کیوں کیا؟ وہ جانتے تھے کہ انہوں نے جو کچھ کیا ہے وہ غیر قانونی اور غیر آئینی ہے، اس لیے انہوں نے ایسا کیا۔ اس سے ظاہر ہے کہ ایل جی نے سپریم کورٹ میں سچ چھپانے کے لیے ایسا کیا۔

دہلی کے وزیر اعلیٰ نے کہا کہ ہم جدوجہد کر رہے ہیں، ہم لڑ رہے ہیں اور آخر میں جمہوریت کی جیت ہو گی۔ ایل جی نے کئی مواقع پر کہا ہے کہ وہ آئین کو نہیں مانتے، ایسے ایل جی کے ساتھ دہلی کو کیسے چلایا جا سکتا ہے۔