غازی آباد میں تیندوے کی دہشت! وکلا کی ہڑتال، عدالتی امور معطل

غازی آباد: غازی آباد کی کچہری میں تندورے کی وجہ سے افرا تفری کا ماحول ہے۔ عدالتیں بند ہیں، کام کاج ٹھپ ہو گیا ہے اور وکلا ہڑتال پر چلے گئے ہیں۔ وکلا کا کہنا ہے کہ جمعرات کو صبح 7.45 پر کچہری کے احاطہ میں تندوا دیکھا گیا ہے۔ اس کے بعد تمام وکلا نے اپنے اپنے چیمبرز بند کر دیئے اور ہڑتال پر چلے گئے۔

دریں اثنا، وکلا کی ہڑتال کے سبب عدالتوں کے کمرے بھی نہیں کھل پائے اور جو عدالتی افسران اور جج حضرات اپنے کمرہ عدالت میں پہنچ گئے تھے وہ بھی واپس لوٹ گئے۔ عدالت کے تمام دروازوں کو بند کر دیا گیا۔

بار ایسوسی ایشن کے سکریٹری نتن یادو نے کہا کہ غازی آباد عدالت کے احاطے میں تیندوے کے نظر آنے سے وکلا اور مدعیان میں بھگدڑ کی صورتحال پیدا ہو گئی ہے اور ہر کوئی خوف و ہراس کے سایہ میں ہے۔ وکلا سیکورٹی کے حوالے سے ہڑتال پر ہیں۔

انہوں نے کہا ’’ہم نے مدعیان سے کہا ہے کہ وہ عدالت کے احاطے کو خالی کر دیں اور جلد از جلد اپنے گھروں کو بحفاظت پہنچ جائیں۔‘‘ اس سلسلے میں جمعرات کو بار ایسوسی ایشن غازی آباد کا اجلاس منعقد کیا گیا اور ہڑتال کی قرارداد منظور کی گئی۔ تجویز کی کاپی ڈسٹرکٹ جج سمیت تمام عدالتوں کو بھیج دی گئی ہے۔