اسرائیل پر بائیں بازو کی جماعتوں نے مودی حکومت کے موقف کی 'سخت تنقید' کی

ہندوستان کی بائیں بازو کی سیاسی جماعتوں نے ہندوستان اور امریکہ کے وزرائے دفاع اور خارجہ کی مشترکہ میٹنگ میں حماس کے خلاف اسرائیلی فوجی کارروائی کو فوری طور پر روکنے کے عالمی مطالبے کی حمایت نہ کرنے پر مودی حکومت کی سخت تنقید کی ہے۔ ان کا کہنا ہے کہ یہ موقف اسرائیل کے اقدامات کو جائز قرار دینے والا ہے۔

ایک مشترکہ بیان میں ان جماعتوں نے غزہ میں جاری کارروائی کو امریکہ اور یہودی ریاست کی طرف سے 'فلسطینیوں کی نسل کشی' قرار دیتے ہوئے اس کارروائی کو فوری طورپر بند کرنے کی اپیل کی۔ کمیونسٹ پارٹی آف انڈیا-مارکسسٹ (سی پی آئی-ایم)، کمیونسٹ پارٹی آف انڈیا، سی پی آئی (مارکسسٹ-لیننسٹ)، آل انڈیا فارورڈ بلاک اور ریوولیوشنری سوشلسٹ پارٹی (آر ایس پی) نے ایک مشترکہ بیان میں مودی حکومت کی سخت تنقید کرتے ہوئے کہا کہ اس نے امریکہ کے ساتھ 2+2 پر (دفاع اور وزرائے خارجہ) کے درمیان مشترکہ مذاکرات میں اسرائیل کے اقدامات کو فوری طور پر ختم کرنے کی عالمی اپیل کی حمایت نہیں کی۔

ان جماعتوں نے قبل ازیں جمعہ کو ہندوستانی حکومت سے امریکہ کے ساتھ نئی دہلی میں ہونے والی میٹنگ میں اسرائیل نسل کشی کی حمایت بند کرنے کی اپیل کی تھی۔بیان میں کہا گیا ہے کہ اس میٹنگ میں ہندوستان نے اسرائیل فلسطین مسئلہ کے لیے دو ریاستی تجویز کی حمایت کا اعادہ کیا ہے اور انسانی بنیادوں پر کارروائی روکنے کی اپیل کی ہے۔ بائیں بازو کی جماعتوں نے کہا ہے کہ 'جنگ بندی کی اپیل نہ کرنا جاری اسرائیلی کارروائی کو جائز قرار دینا ہے۔'

بیان میں کہا گیا ہے کہ اسرائیل کی کارروائی میں 10 ہزار سے زائد افراد ہلاک ہو چکے ہیں جن میں سے نصف بچے تھے۔سی پی آئی (ایم) کے جنرل سکریٹری سیتارام یچوری نے ٹویٹر پر یہ بیان پوسٹ کیا اور لکھا، "یہ بربریت بند کرو۔"