پنجاب میں تشدد کی واردات میں اضافہ، وزیر اعلی مان تشہیر میں مصروف

شرومنی اکالی دل نے کہا ہے کہ وزیراعلیٰ بھگونت مان کوپنجاب میں بگڑتی لاء اینڈ آرڑد کی صورتحال پر توجہ دینا چاہیے لیکن وہ گجرات اور ہماچل میں پارٹی کی تشہیر میں مصروف ہیں۔

ایس اے ڈی کے نائب صدر دلجیت سنگھ چیمہ نے کہا کہ عام آدمی پارٹی کی حکومت بننے کے بعد ریاست کی لاء اینڈ آرڈر اور نظم و نسق کی صورتحال بد سے بدتر ہو گئی ہے۔ ہم نہ صرف کبڈی کھلاڑیوں کو قتل ہوتے دیکھ رہے ہیں بلکہ گینگیسٹر کی جانب سے گولی چلانا اور جیتوں ٹرک یونین کی تحویل کے دوران ہوئی جھڑپ دیکھی بلکہ فرقہ وارانہ گڑبڑی بھی ہوتی دیکھی ہیں۔

چیمہ نے کہا کہ ایسا لگ رہا ہے کہ اے اے پی کے رہنماؤں کو جیتوں میں لاء اینڈ آرڈر کو اپنے ہاتھ میں لیتے ہوئے دیکھا گیا اور پولیس فورس خاموش تماشائی بن کر دیکھتی رہی۔ صورتحال اس حد تک خراب ہو گئی کہ رام پورہ پھول کے سابق وارڈ میمبر اور اے اے پی کے رہنما سریندر بنسل نے رام پورہ تھانے میں افسر کے چہرے پر مکا مارنے کے علاوہ ایس ایچ او کی وردی بھی پھاڑ دی۔

انہوں نے کہا کہ وزیراعلیٰ کو پولیس فورس کی جائزہ میٹنگ کرنی چاہیے۔ پولیس فورس کو لاء اینڈ آرڈر کو سختی سے قائم رکھنے کے لیے ہدایت دی جانی چاہیے۔ بد قسمتی سے پولیس تھانے کو زیادہ تر پیشہ ور طریقے سے لاء اینڈ آرڈر کی ذمہ داریوں کو نبھانے کے لیے سخت ہدایت دینے کے بجائے، ایک اینٹی گینگیسٹر ٹاسک فورس بنائے جانے جیسے بڑے اعلانات پر تشہیر پر زور دیا جا رہا ہے۔

انہوں نے کہا کہ مجرم لاء اینڈآرڈر کی ڈھیلائی کا فائدہ اٹھا رہے ہیں، جس سے جرم کا گراف بڑھتا جا رہا ہے۔ پولیس فورس کی دن رات کی گشت بڑھانے اور جرم کے تئیں زیرو ٹالرینس جیسے ٹھوس قدم فوراً اٹھانے چاہیئیں۔

دوسری جانب پنجاب کے سابق وزیراعلیٰ کیپٹن امریندر سنگھ نے پٹیالہ میں پنجابی یونیورسٹی کے انٹری گیٹ کے سامنے منگل کی رات ایک شخص کو گولی مار کر قتل کیے جانے پر شدید تشویش کا اظہار کیا۔
کیپٹن سنگھ نے ٹویٹ کیا کہ پنجاب میں حال کے دنوں میں تشدد کی وارداتیں بڑھی ہیں۔ ریاست کی پولیس جرائم پر قابو پانے میں پوری طرح اہل ہے، بشرطیکہ اسے بھگونت مان حکومت کھلی چھوٹ دے۔ پولیس جرائم سے نمٹنے کی اہل ہے۔

انہوں نے کہا کہ ریاستی حکومت کو سخت کاروائی کرنی چاہیے اور پنجاب کو بڑی مشکل سے ملے امن اور بھائی چارے کو خراب کرنے کی کسی کو اجازت نہیں دینی چاہیے۔