ترکیے میں زلزلہ کے بعد 6 سالہ بچی کی جان بچانے والی ’لیبراڈور جولی‘ کو اعزاز سے کیا گیا سرفراز

نیشنل ڈیزاسٹر ریکشن فورس یعنی این ڈی آر ایف کی 6 سالہ لیبراڈور جولی کو فروری میں زلزلہ متاثرہ ترکیے میں ملبہ کے ڈھیر میں دبی ایک چھوٹی بچی کی جان بچانے کے لیے اعزاز سے نوازا گیا ہے۔ ترکیے میں زلزلہ کے بعد جولی نے دفاعی ٹیم کی بہت مدد کی تھی جس کے بعد اس اسپیشل ڈاگ کی خوب تعریف ہوئی تھی۔

جولی ترکیے میں دفاعی ٹیم کے طور پر بھیجے گئے این ڈی آر ایف دستہ کا حصہ تھی۔ اسے 6 فروری کو ترکیے اور 7 فروری کو شام میں آئے 7.8 شدت کے زلزلہ میں متاثر ہوئے لوگوں کو بچانے اور راحت فراہم کرنے کے لیے ’آپریشن دوست‘ کا حصہ بنا کر بھیجا گیا تھا۔ جولی کو زلزلہ کے دوران تلاشی و بچاؤ میں اہم کردار نبھانے کے لیے ’ڈائریکٹر جنرلس کمنڈیشن رول‘ سے نوازا گیا ہے۔

ایک سینئر افسر کے مطابق جولی کو یہ ایوارڈ ایک کثیر منزلہ عمارت کے ملبہ سے 70 گھنٹے سے زیادہ وقت تک پھنسی چھ سالہ بچی بیرین کو سونگھ کر اس کا پتہ لگانے میں نبھائے گئے کردار کے لیے دیا گیا ہے۔ بیرین کو ملبہ سے اس وقت نکالا گیا تھا جب جولی کے ذریعہ اشارہ کیا گیا۔ اشارہ ملنے کے بعد اس کے معاون رومیو اور ایک دیگر لیبراڈور کتے کی مدد سے بیرین کی موجودگی کی تصدیق کی گئی تھی۔ جولی فی الحال کولکاتا واقع این ڈی آر ایف کی دوسری بٹالین کے ساتھ کام کر رہی ہے۔