پٹنہ میں میٹرو ٹنل میں بریک فیل ہونے سے لوکو پک اپ تین مزدوروں پر چڑھ گئی، ایک کی موت

بہار کی راجدھانی پٹنہ میں ایک بڑا حادثہ پیش آیا ہے۔ این آئی ٹی موڑ پر ایگزٹ پوائنٹ کے قریب میٹرو ٹنل میں حادثے میں ایک مزدور کی موت ہو گئی۔ دو مزدوروں کو بچا لیا گیا ہے۔ نیوز پورٹل ’آج تک‘ پر شائع خبر کے مطابق بتایا جا رہا ہے کہ بریک فیل ہونے کی وجہ سے تینوں مزدور لوکو پک اپ کی زد میں آ گئے۔

بتایا جا رہا ہے کہ کارکن ٹنل کے اندر رات کی شفٹ میں کام کر رہے تھے۔ اسی دوران ایک لوکو پک اپ کے بریک فیل ہو گئے اور وہ  مزدوروں کے اوپر چڑھ گئی۔ ایک مقامی نے بتایا کہ لوکو پوری طرح سے بھرا ہوا تھا۔ ایک اور نے بتایا کہ لوکو اوور لوڈ تھا اور اسے لوڈ کر کے اندر بھیج دیا گیا۔

شائع خبر کے مطابق مقامی لوگوں نے بتایا کہ اندرونی راستے پر مکمل ڈھلوان ہے اور بریک لگنے سے لوکو اندر جاکر ٹکرا گئی جس میں مزدور دب گئے ۔ موقع پر پہنچنے والے پیربہور تھانے کے سربراہ محمد حلیم نے بتایا کہ سرنگ کے اندر تین مزدور کام کر رہے تھے، جن میں سے دو زخمی ہوئے، جنہیں اسپتال میں داخل کرایا گیا ہے۔ تھانہ صدر نے ٹھیکیدار کے حوالے سے بتایا کہ حادثے میں سرنگ کے اندر ایک مزدور کی موت ہو گئی۔ انہوں نے کسی مزدور کا نام ظاہر نہیں کیا اور مقامی لوگوں کے دعووں کی بھی تصدیق نہیں کی۔