ہماچل پردیش اسمبلی کے مین گیٹ اور باؤنڈری وال پر خالصتانی پرچم نصب، پولیس متحرک

دھرم شالہ: ہماچل پردیش کی دھرم شالہ میں واقع قانون ساز اسمبلی کے مین گیٹ اور باؤنڈری وال پر نامعلوم افراد نے گزشتہ شب خالصتان کے پرچم نصب کر دئے، جس کے سبب پولیس اور انتظامیہ میں ہلچل مچ گئی۔ آناً فاناً میں اسمبلی کے گیٹ اور باؤنڈری وال سے خالصتانی پرچموں کو ہٹا دیا گیا۔ پولس پورے معاملے کی جانچ میں مصروف ہے اور معلوم کیا جا رہا ہے کہ اس شرارت کے پیچھے کس کا ہاتھ ہے۔

یہ واقعہ اس وقت منظر عام پر آیا جب صبح کی سیر پر نکلے کچھ لوگوں نے اسمبلی کے گیٹ اور باؤنڈری وال پر پرچم لگے دیکھے۔ پرچم پر گرومکھی (پنجابی) میں خالصتان لکھا ہوا ہے۔ اس کے علاوہ اسمبلی کی دیوار پر بھی گرومکھی میں خالصتان لکھا گیا ہے۔ ہماچل کے ضلع کانگڑا میں واقع دھرم شالہ میں خالصتانیوں کے پرچم کس طرح نصب ہوئے اس حوالہ سے سکیورٹی ایجنسیوں پر سوال اٹھائے جا رہے ہیں۔ سوال یہ بھی اٹھ رہا ہے کہ اسمبلی کے احاطہ میں سی سی ٹی وی کیمرے کیوں نہیں ہیں جو اس حرکت کو قید کر لیتے اور شرارتی عناصر کی شناخت ہو جاتی۔

اسمبلی کے گیٹ پر خالصتانی تحریک سے وابستہ پرچم نصب کئے جانے کے بعد کانگڑا کے ایس پی خوشحال شرما نے کہا ’’پرچم یا تو دیر رات گئے نصب کئے گئے ہیں یا پھر انہیں علی الصبح نصب کیا گیا ہوگا۔ ہم نے اسمبلی کے گیڑ سے ان قابل اعتراض پرچموں کو ہٹا دیا ہے۔ یہ ہماچل میں سیر پر آئے پجاب کے کچھ سیاحوں کی حرکت ہو سکتی ہے۔ ہم آج اس معاملہ میں ایف آئی آر درج کرنے جا رہے ہیں۔‘‘