کیرالہ طیارہ حادثہ: آخر کیا ہوتا ہے 'ٹیبل ٹاپ رَن وے' جو بنا حادثہ کا سبب؟

کیرالہ طیارہ حادثہ کی وجہ خراب موسم، رَن وے پر جمع پانی اور تیز ہوائیں بتا جا رہی ہیں، لیکن کئی ماہرین نے اس کے لیے 'ٹیبل ٹاپ رَن وے' کو ذمہ دار ٹھہرایا ہے۔ دراصل ٹیبل ٹاپ رَن وے پر طیارہ کی لینڈنگ جوکھم بھری ہوتی ہے اور خراب موسم میں خطرہ مزید بڑھ جاتا ہے۔ کیرالہ کے کوزیکوڈ میں بھی کچھ ایسا ہی ہوا معلوم پڑتا ہے۔ رَن وے پر پھسل کر طیارہ سیدھے تقریباً 35 فیٹ نیچے کھائی میں جا گرا۔ طیارہ کا اگلا حصہ زمین سے ٹکرایا اور پھر ٹوٹ کر الگ ہو گیا۔

بہت سے لوگوں کو معلوم نہیں ہوگا کہ ٹیبل ٹاپ رَن وے آخر ہوتا کیا ہے۔ درحقیقت یہ رَن وے عموماً چھوٹا ہوتا ہے اور کسی پٹھار یا پہاڑ کے اوپری حصے پر بنا ہوتا ہے۔ رَن وے کے ایک طرف یا پھر دونوں طرف گہری کھائی ہوتی ہے۔ رَن وے ختم ہونے کے بعد آگے زیادہ جگہ نہیں ہوتی ہے، اس لیے کئی بار لینڈنگ کافی خطرناک ہو جاتی ہے۔ پائلٹ کے لیے ٹیبل ٹاپ رَن وے پر لینڈنگ کسی چیلنج سے کم نہیں ہوتی ہے اور ذرا سی غلطی حادثے کا سبب بن جاتی ہے۔ خراب موسم میں حادثے کا اندیشہ زیادہ بڑھ جاتا ہے کیونکہ پائلٹ کو رَن وے صاف دکھائی نہیں دیتا۔

ہندوستان میں تین ٹیبل ٹاپ رَن وے اس وقت موجود ہیں۔ ایک کرناٹک کے منگلورو میں ہے، دوسرا میزورم میں ہے اور تیسرا کیرالہ کا کوزیکوڈ ائیر پورٹ ہے جہاں ائیر انڈیا کا طیارہ 7 اگست کو حادثہ کا شکار ہوا۔ جمعہ کو ہوئے حادثہ کے تعلق سے بتایا جاتا ہے کہ پائلٹ نے رَن وے پر خطرہ دیکھتے ہوئے دو بار لینڈنگ کرنے کا ارادہ کر کے اپنا ارادہ ترک کر دیا تھا اور تیسری بار لینڈنگ کی جو کہ خطرناک ثابت ہوئی۔ خبروں کے مطابق پہلی بار رَن وے کا جائزہ لیتے ہوئے پائلٹ نے طیارہ کی لینڈنگ نہیں کی اور رَن وے سے آگے نکال لیا۔ دوسری بار کوشش کی لیکن ناکام رہے۔ پھرتیسری بار لینڈنگ ہوئی جو اچانک پھسل کار کھائی میں جا گری۔