کیرالہ ہائی کورٹ نے ڈاکٹر وندنا کے قتل معاملے میں وزیر اعلیٰ پینارائی وجین کو جاری کیا نوٹس

کیرالہ کی ایک خاتون ڈاکٹر کے قتل معاملے میں کیرالہ ہائی کورٹ نے آج ریاست کے وزیر اعلیٰ پینارائی وجین کو نوٹس جاری کیا ہے۔ دراصل خاتون ڈاکٹر کے قتل کے بعد اس کے اہل خانہ کو معاوضہ دینے والی عرضی پر 22 مئی کو کیرالہ ہائی کورٹ سماعت کر رہی تھی۔ اس میں اہل خانہ کو ایک کروڑ روپے کا معاوضہ فراہم کرنے کے لیے ریاستی حکومت کو ہدایت دینے کا مطالبہ کیا گیا ہے۔

دراصل کوٹایم ضلع کے کڈوتھروتھی علاقے کی باشندہ اور اپنے والدین کی اکلوتی اولاد ڈاکٹر وندنا داس کا کولم ضلع کے ایک اسپتال میں علاج کے دوران قتل کر دیا گیا تھا۔ اس کے لیے معاوضہ کی عرضی ہائی کورٹ میں داخل کی گئی تھی جس پر سماعت کے دران عدالت نے کیرالہ کے وزیر اعلیٰ کو نوٹس جاری کیا ہے۔ ساتھ ہی عرضی کو قتل کے بعد شروع کیے گئے از خود نوٹس معاملے کے ساتھ ٹیگ کرنے کا بھی حکم دیا گیا ہے۔

میڈیا رپورٹس کے مطابق اسپتال میں علاج کے لیے لائے گئے ایک شخص نے اس کے زخم کی مرہم پٹی کرتے وقت قینچی اور سرجری میں استعمال ہونے والے بلیڈ سے حملہ کر ڈاکٹر وندنا داس کا قتل کر دیا تھا۔ اس کے بعد ریاست بھر کے مختلف اسپتالوں میں طبی اہلکاروں، میڈیکل انٹرن، طلبا اور ہاؤس سرجن نے سڑکوں پر احتجاجی مظاہرہ شروع کر دیا تھا۔ قتل کی مخالفت میں ڈاکٹروں نے ہڑتال کر ریاستی حکومت سے اسپتالوں کی سیکورتی کے لیے فوری اثر سے نیا قانون لائے جانے کا مطالبہ کیا تھا۔