ٹی آر ایس اراکین اسمبلی کی خرید-فروخت معاملے میں کیرالہ کا ڈاکٹر فرار، ایس آئی ٹی کی تلاش جاری

تلنگانہ میں ٹی آر ایس اراکین اسمبلی کی خرید و فروخت معاملے میں اہم ملزم رام چندر بھارتی کا قریبی دوست بتایا جا رہا کیرالہ کا ڈاکٹر فرار ہو گیا ہے۔ سنسنی خیز معاملے کی جانچ کر رہی ایس آئی ٹی نے کیرالہ میں ڈاکٹر کی رہائش پر تلاشی لی لیکن وہ نہیں ملا۔ اس کے بعد ایس آئی ٹی نے ڈاکٹر کی تلاش تیز کر دی ہے۔

اس سنسنی خیز معاملے میں گزشتہ دو دنوں کے دوران ایس آئی ٹی نے جانچ کے تحت ملک کے مختلف مقامات پر چھاپہ ماری کی۔ کیرالہ، دہلی، ہریانہ، آندھرا پردیش اور کرناٹک میں کچھ مشتبہ لوگوں کے دفاتر اور رہائش پر چھاپے مارے گئے۔ گزشتہ ہفتہ پولیس کے ذریعہ ملزمین سے حاصل کی گئی جانکاری کی بنیاد پر حیدر آباد میں بھی چھاپہ ماری کی گئی۔

سائبرآباد پولیس نے 26 نومبر کو رام چندر بھارتی، سمہا جی اور نند کمار کو اس وقت گرفتار کیا تھا جب وہ تلنگانہ کی برسراقتدار پارٹی ٹی آر ایس (تلنگانہ راشٹر سمیتی) کے چار اراکین اسمبلی کو 250 کروڑ روپے نقد کی پیشکش کے ساتھ لبھانے کی کوشش کر رہے تھے۔ یہ چھاپہ ماری ایک رکن اسمبلی پائلٹ روہت ریڈی کی خفیہ اطلاع پر کی گئی تھی۔ انھوں نے الزام عائد کیا کہ ملزمین نے انھیں 100 کروڑ روپے اور تین دیگر کو 50-50 کروڑ روپے کی پیشکش کی۔

ملزمین پر معین آباد پولیس اسٹیشن میں تعزیرات ہند کی دفعہ اور انسداد بدعنوانی ایکٹ کی مختلف دفعات کے تحت معاملہ درج کیا گیا تھا۔ فی الحال ملزمین عدالتی حراست میں ہیں۔ تلنگانہ پولیس کی ایس آئی ٹی نے جمعرات اور جمعہ کو ان سے پوچھ تاچھ کی۔ تحقیقات کر رہے افسران ان لوگوں کا پتہ لگانے کی کوشش کر رہے ہیں جو اراکین اسمبلی کو خریدنے کی کوشش کے پیچھے ہیں۔ وہ یہ بھی پتہ لگانے کی کوشش کر رہے ہیں کہ انھیں 250 کروڑ روپے دینے کے لیے کون راضی ہوا تھا۔

ایس آئی ٹی کی قیادت حیدر آباد پولیس کمشنر سی وی آنند کر رہے ہیں۔ ٹیم میں چھ دیگر پولیس افسر شامل ہیں۔ اس درمیان بنجارا ہلز پولیس نے نند کمار کے خلاف درج دو معاملوں میں ان کے خلاف پی ٹی وارنٹ جاری کیا۔ وارنٹ پیر کو شہر کی ایک عدالت میں پیش کیا گیا۔

میونسپل کارپوریشن کے افسران نے اتوار کو مبینہ طور سے نند کمار کے غیر قانونی تعمیرات کو گرا دیا تھا۔ گریٹر حیدر آباد میونسپل کارپوریشن (جی ایچ ایم سی) کی ٹاؤن پلاننگ وِنگ نے اَپ اسکیل جبلی ہلز میں فلم نگر میں نند کمار کے ذریعہ چلائے جا رہے ہوٹل ڈکن کچن میں دو غیر قانونی تعمیرات کو منہدم کر دیا۔