کیجریوال کی درخواست ضمانت منظور ہوگی یا نہیں! آج فیصلہ سنا سکتا ہے سپریم کورٹ

نئی دہلی: آج عام آدمی پارٹی (آپ) کے لیڈروں اور کارکنوں کی نظریں سپریم کورٹ پر لگی ہوئی ہیں۔ دہلی کے وزیر اعلی اروند کیجریوال کی ضمانت پر سپریم کورٹ آج فیصلہ دے سکتی ہے۔ رپورٹ کے مطابق اگر کیجریوال کو ضمانت مل جاتی ہے تو دہلی میں تعطل کا شکار کام میں تیزی آئے گی۔

اس معاملے کی آخری سماعت جمعرات کو جسٹس سوریا کانت اور جسٹس اجل بھوئیاں کی بنچ نے کی تھی۔ فریقین کے وکلاء کے دلائل پیش کرنے کے بعد سپریم کورٹ نے درخواست پر فیصلہ محفوظ رکھا تھا۔

کیجریوال کے وکیل ابھیشیک منو سنگھوی نے اپنی دلیل میں کہا تھا کہ کیجریوال کا نام 2022 میں درج ایف آئی آر میں نہیں تھا اور انہیں اس سال جون میں گرفتار کیا گیا تھا۔ وہیں، سی بی آئی نے کہا تھا کہ کیجریوال 'مجرمانہ سازش' میں ملوث تھے۔

رپورٹ کے مطابق وزیر اعلیٰ اروند کیجریوال کو ضمانت ملنے سے دہلی کے ترقیاتی کاموں میں تیزی آنے کی امید ہے۔ جیل میں رہنے کی وجہ سے کئی اہم کام ٹھپ ہو گئے ہیں۔

وزیر اعلیٰ کے جیل میں ہونے کی وجہ سے دہلی حکومت کی ترقی کی رفتار سست پڑ گئی ہے۔ مارچ سے کابینہ کے اجلاس نہ ہونے کی وجہ سے حکومت کے تمام اہم کام تقریباً ٹھپ ہو کر رہ گئے ہیں۔

دوسری طرف پریزائیڈنگ آفیسر کی تعیناتی نہ ہونے کی وجہ سے دہلی میونسپل کارپوریشن میں 26 اپریل کو میئر کا انتخاب نہیں ہو سکا۔ لیفٹیننٹ گورنر وزیر اعلیٰ کی سفارش پر پریزائیڈنگ آفیسر کی تقرری کرتے ہیں۔

وزیر اعلیٰ کے جیل میں ہونے کی وجہ سے یہ ممکن نہیں ہو سکا اسی وجہ سے میئر ڈاکٹر شیلی اوبرائے کی مدت کار میں توسیع کر دی گئی۔ قواعد کے مطابق اس بار ایک درج فہرست ذات کے کونسلر کو میئر بننا ہے۔