کیجریوال نے اہل خانہ کے ساتھ ڈالا ووٹ، ووٹروں سے آمریت کے خلاف ووٹ دینے کی اپیل

نئی دہلی: دہلی کے وزیر اعلی اروند کیجریوال نے ہفتہ کو اپنے خاندان کے ساتھ ووٹ ڈالا۔ کیجریوال اپنی بیوی سنیتا کیجریوال، والد اور بچوں کے ساتھ چاندنی چوک لوک سبھا حلقہ کے تحت سول لائنز کے بوتھ پر پہنچے۔

ووٹ ڈالنے کے بعد صحافیوں سے بات کرتے ہوئے کیجریوال نے کہا کہ لوگ آمریت، مہنگائی اور بے روزگاری کے خلاف بڑی تعداد میں ووٹ دے رہے ہیں۔ انہوں نے ووٹروں سے اپیل کی کہ وہ شدید گرمی کے باوجود پولنگ اسٹیشنوں پر پہنچ کر ان مسائل کے خلاف ووٹ دیں۔

کیجریوال نے کہا، ’’میرے والد، میری بیوی اور میرے دونوں بچوں نے ووٹ دیا۔ میری والدہ آج نہیں آ سکیں کیونکہ ان کی طبیعت بہت خراب ہے۔ میں نے آمریت، مہنگائی اور بے روزگاری کے خلاف ووٹ دیا ہے۔ میں تمام ووٹرز سے اپیل کرنا چاہتا ہوں کہ شدید گرمی کے باوجود گھروں میں نہ بیٹھیں اور اپنا ووٹ ضرور ڈالیں۔ آمریت کے خلاف ووٹ دیں۔‘‘

خیال رہے کہ دہلی میں صبح 11 بجے تک 21.69 فیصد ووٹنگ ہوئی تھی۔ چاندنی چوک میں 18.55 فیصد، مشرقی دہلی میں 22.41 فیصد، نئی دہلی میں 19.18 فیصد، شمال مشرقی دہلی میں 24.49 فیصد، شمال مغربی دہلی میں 22.67 فیصد، جنوبی دہلی میں 21 فیصد اور مغربی دہلی میں 21.56 ووٹنگ درج کی گئی۔

الیکشن حکام نے کہا کہ کسی بھی پولنگ اسٹیشن پر ووٹنگ کے آغاز میں تکنیکی خرابی یا تاخیر کی کوئی اطلاع نہیں ہے۔ دریں اثنا، سی پی آئی (ایم) کی رہنما برندا کرات، جو نئی دہلی کے سینٹ تھامس اسکول میں اپنا ووٹ ڈالنے گئی تھیں، نے کہا کہ وہ کسی خرابی کی وجہ سے اپنا ووٹ نہیں ڈال سکیں۔ انہوں نے کہا، ’’الیکٹرانک ووٹنگ مشین (ای وی ایم) کی بیٹری خراب ہو گئی تھی، اس لیے میں ووٹ نہیں ڈال سکی لیکن میں پھر آؤں گی۔ انہوں نے الیکشن کمیشن کے نظام پر بھی سوالات اٹھائے۔