دہلی کی 1797 غیر قانونی کالونیوں کو ریگولر کیا جائے گا، اروند کیجریوال کا اعلان

نئی دہلی: دہلی کے وزیراعلی اروند کیجریوال نے جمعرات کو اعلان کیا کہ مرکزی حکومت نے دارالحکومت کی غیر قانونی کالونیوں کو ریگولائز کرنے کی منظوری دے دی ہے جس سے وہاں رہنے والے لوگوں کو ان کی زمین کا مالکانہ حق مل جائے گا۔

کیجریوال نے یہاں نامہ نگاروں سے کہا، ’’مرکز نے دہلی حکومت کی غیر قانونی کالونیوں کو ریگولائز کرنے کی تجویز پر مثبت جواب دیا ہے۔ میں نےمحکمہ محصولات کو ہدایت دی ہیں کہ وہ غیر قانونی کالونیوں میں رہنے والے لوگوں کو فوری طور پر مالکانہ حق منتقل کرنے اور رجسٹری کرانے کا کام کرے۔‘‘

وزیراعلی نے کہا ،’’دہلی میں غیر قانونی کالونیوں میں رہنے والے لوگوں کےلئے اچھی خبر ہے۔ ان کا مستقل گھروں میں رہنے کا خواب پورا ہو جائے گا۔ الیکشن سے پہلے دیگر سیاسی پارٹیاں ان کالونیوں کو ریگولائز کرانے کا وعدہ کرتی تھیں لیکن بعد میں وہ اسے بھول جاتی تھیں۔ اس بار ہماری حکومت بننے کے بعد ہم نے فیصلہ کیا ہے کہ ہم ان کالونیوں میں رہنے والوں کو ان کا حق دلائیں گے۔‘‘

کیجریوال نے کہا کہ دہلی کابینہ نے ایک تجویز پر اپنی مہر لگا کر 15 نومبر کو اسے مرکز کو بھیجا تھا۔دہلی حکومت اب جلد ہی 1797غیر قانونی کالونیوں کا رجسٹریشن شروع کرا دے گی۔

انہوں نے کہا کہ بدھ کی شام دہلی حکومت کو مرکزی حکومت سے ان کالونیوں کے بارے میں بھیجی گئی تجویز پر مثبت جواب ملا۔ مرکزی حکومت ان کالونیوں کو مستقل کرنے کے لئے تیار ہے۔ وہ اس کے لئے مرکزی حکومت کا شکریہ ادا کرنا چاہتے ہیں۔ مرکزی حکومت نے سوال پوچھے ہیں، جن کے جواب دے دیئے جائیں گے۔

انہوں نے کہا، ’’ان کالونیوں میں رہنے والے لوگوں نے کوئی ترقیاتی کام نہیں دیکھا۔ سال 2015 سے ان میں سڑکوں اور پائپ لائنوں وغیرہ پر بے مثال طریقہ سے 6000 کروڑ روپے خرچ کیے گئے ہیں۔