کشمیر: اوڑی سیکٹر میں ایل او سی پر در اندازی کی کوشش ناکام بنانے کے دوران جے سی او زخمی

سری نگر: شمالی کشمیر کے ضلع بارہمولہ کے اوڑی سیکٹر میں لائن آف کنٹرول پر ہفتے کی صبح در اندازی کی ایک کوشش کو ناکام بنانے کے دوران ایک جونئیر کمشنڈ افسر(جے سی او) معمولی طور زخمی ہو گئے ہے۔ ایک دفاعی ترجمان نے بتایا کہ بارہمولہ کے اوڑی سیکٹر میں ملی ٹنٹوں کی طرف سے در اندازی کی ایک کوشش کو ناکام بنا دیا گیا۔

انہوں نے کہا کہ طرفین کے درمیان گولیوں کے تبادلے کے دوران ایک جے سی او معمولی طور پر زخمی ہوگیا۔ ان کا کہنا تھا کہ پاکستان کی طرف سے جائے وقوعہ پر ایک کواڈ کاپٹر اڑانے کی کوشش کی گئی لیکن ہندوستان کی جانب سے فائرنگ کے بعد وہ واپس چلا گیا۔ دریں اثنا واقعے کے بعد فوج نے اس علاقے میں تلاشی آپریشن شروع کر دیا ہے۔

اوڑی سیکٹر میں در اندازی کی کوشش کو ناکام بنانے کا یہ واقعہ اس وقت پیش آیا ہے جب سری نگر میں ماہ رواں کے اواخر میں منعقد ہونے والے جی-ٹونٹی ورکنگ گروپ اجلاس کے پیش نظر جموں وکشمیر کے سرحدوں پر سیکورٹی کو ہائی الرٹ پر رکھا گیا ہے۔