کشمیر ہندوستان کا اٹوٹ حصہ ہے: امت شاہ

بلڈھانا: مرکزی وزیر داخلہ اور بی جے پی (بھارتیہ جنتا پارٹی) کے سربراہ امت شاہ نے جمعہ کے روز مہاراشٹر میں ایک مرتبہ پھر دوہرایا ہے کہ جموں و کشمیر ہندوستان کا اٹوٹ حصہ ہے۔ ان کا یہ بیان ایسے وقت میں آیا ہے جبکہ وزیر اعظم نریندر مودی تمل ناڈو میں چینی صدر شی جنپنگ سے ملاقات کر رہے ہیں۔ خیال رہے کہ چین مسئلہ کشمیر پر ہمیشہ سے پاکستان کے موقف کی تائید کرتا رہا ہے۔

بر سر اقتدار جماعت کے سربراہ نے کہا کہ آرٹیکل 370 کو منسوخ کرنے اور جموں و کشمیر سے خصوصی ریاست کا درجہ واپس لینے کا سہرہ بی جے پی کے سر بندھتا ہے۔

ودربھ کے بلڈھانا ضلع کے چکھلی میں ایک انتخابی ریلی سے خطاب کے دوران امت شاہ نے مزید کہا، ’’بی جے پی کے لئے ملک ہمیشہ پہلے ہے۔ ہم نظریہ والی جماعت ہیں، کنبہ پروری کو فروغ دینی والی جماعت نہیں۔ ہم کانگریس کی طرح ووٹ بینک کی سیاست نہیں کرتے۔‘‘

جموں و کشمیر کے حالات کو مہاراشٹر کے حوالہ سے بھی اہم قرار دیتے ہوئے امت شاہ نے کہا کہ ’کشمیر میں ہزاروں لوگوں کو دہشت گردوں‘ نے مار دیا لیکن کانگریس-این سی پی نے آرٹیکل 370 کو منسوخ کرنے کی مخالفت کی۔‘

انہوں نے کہا کہ وزیر اعلیٰ دیویندر فڑنویس کی حکومت نے گزشتہ پانچ سالوں میں تمام شعبوں میں سہ رخی ترقی کی ہے۔ شاہ نے لوگون سے اپیل کی کہ 21 اکتوبر کو ہونے جا رہے اسمبلی انتخابات میں مکمل اکثریت کے ساتھ پارٹی کی اقتدار میں واپسی کو یقینی بنائیں۔